OBWOMEEZI BWAITU NK’ABAKRISTAAYO
Ebijaguzo Ebya Buli Mwaka—Kaabaga Kasumi ak’Okwolekangana Okugonza
Habwaki twegondeza muno omu nsorrokano zaitu enkooto eza buli mwaka? Nk’oku kikaba kiri omu busumi bw’Abaisaleri, kasumi kanu ensorrokano zituha omugisa ogw’okuramya Yahwe tuli n’ebikumi rundi n’enkumi z’Abakristaayo bagenzi baitu. Twegondeza omu by’okulya byaitu eby’omwoyo ebitutunga omu bwingi. Twegondeza n’omu bwire obutumara n’abanywani hamu n’ab’omu maka gaitu. Twoleka ngu nitusiima muno obutuba ha rusorrokano orukooto habw’ebiro bisatu byona.
Obutuba n’omugisa ogw’okusorrokana hamu, titusemeriire kutekerezaaho omulingo turagasirwa kwonka, baitu tutekerezeeho n’omulingo tusobora kwolekamu abandi okugonza. (Bag 6:10; Baheb 10:24, 25) Obutukingurraho ow’oruganda rundi munyaanya itwe orwigi, rundi obutukwata ebiikaro ebituraikarra byonka, tuba nitwoleka ngu nitwebembeza eby’abandi. (Baf 2:3, 4) Ensorrokano enkooto zituha omugisa gw’amaani ogw’okutunga abanywani abahyaka. Puroguramu obw’eba etakatandikire rundi omu bwire obw’okuhumuramu nyamusana, nitusobora kweteraho ekigendererwa ky’okubaza n’omuntu oututamanyire. (2Kol 6:13) Nitusobora kutandikaho omuganjano n’omuntu, ogulihangaara ebiro n’ebiro! Kandi ekirukukirayo, abantu abandi kakuba barora omulingo turukwolekamu okugonza kwonyini, nibasobora kucwamu kutweteranizaaho omu kuheereza Yahwe.—Yoh 13:35.
MUROLE VIDIYO “OKUGONZA TIKUHWAHO”! ENSORROKANO ENKOOTO EZ’ENSI YOONA, HANYUMA MUGARUKEMU EBIKAGUZO BINU:
Abagenyi bakoolekwa bata okugonza h’ansorrokano enkooto ez’ensi yoona ez’omwaka 2019?
Habwaki obumu n’okugonza okuli hagati y’abantu ba Yahwe nibihuniiriza muno?
Kugonza kwa mulingo ki okw’Ekikristaayo okwayolekerwe ab’oruganda abali h’Akatebe Akalemi?
N’osobora ota kwongera ha kugonza okwolekwa ha nsorrokano enkooto?
Okugonza kukeyoleka kuta omu ihanga lya Germany, n’omu ihanga lya South Korea?
Tusemeriire kucweramu kimu kukora ki?