Okwekebiija Ekyahandiikirwe Kya Buli Kiro, kikugasira?

Kusoma ekyahandiikirwe kya buli kiro ekirugire omu Baibuli hamu n’ebirukukibazaaho ebiri omu katabu Kwekebiija Ebyahandiikirwe Buli kiro, kiri kimu ha bintu nkora kusobora kwirra haihi na Yahwe? Obworaaba otarukukikora, n’osobora kutandika kukikora buli kiro? Baingi basoma ekyahandiikirwe buli nyenkyakara nukwo kibasobozesa kwikara nibakiteekerezaaho obubarukuba nibakora emirimo yabo. (Yos 1:8; Zab 119:97) Nosobora ota kugasirwa kuruga omu kusoma Ekyahandiikirwe? Soma ebyahandiikirwe ebindi ebikyetoroire nukwo omanye ebintu ebindi ebirukukikwataho. Lengaho kuteekerezaho ebintu ebiri omu Baibuli ebisobora kuba nibiikiranganiza n’omusingi ogubazibweho omu kyahandiikirwe eki. Hanyuma kozesa omusingi ogu omu bwomeezi bwawe. Kakuba okozesa Ekigambo kya Ruhanga obworukuba n’okora encwamu, nikiija kuterekereza obwomeezi bwawe kandi kikugasire muno.​—Zab 119:105.

Beseeri eziri omu nsi yoona ziba n’okwekebiija ekyahandiikirwe kya buli kiro ha bwire bwanyekyakara. Omu myaka ey’enyuma, entekaniza zinu zibaire niziteekwa ha JW Broadcasting^® nambere hali PROGRAMS AND EVENTS. Okamalirra ddi kurora emu ha vidiyo zinu? Obundi ezimu zibamu obuhabuzi bwonyini obw’orukwetaaga. Nk’ekyokurorraho, Ebyahandiikirwe ebirukubazaaho Loti nibisobora kukwataho bita encwamu zaawe?

MUROLE VIDIYO MUTALIGONZA ENSI (1YOH 2:15), HANYUMA MUGARUKEMU EBIKAGUZO BINU:

• Puroguramu enu ey’okwekebiija ekyahandiikirwe kya buli kiro ekasigikirra ha kyahandiikirwe ki?

• Ekyokurorraho kya Loti nikitwegesa ki ha bizibu ebiruga omu kugonza ensi hamu n’ebintu ebirumu?​—Kub 13:12; 14:12; 19:3, 12, 13, 24-26

• Twoleka tuta ngu nitugonza Yahwe hatali ensi n’ebintu ebirumu?