Muhondere Ekyokurorraho kya Banabbi—Habakuki
1. Habwaki nitusobora kugamba ngu naitwe nitusisana Habakuki?
1 Nk’Oku obubi burukweyongera omu nsi enu, nitusobora kwehurra nk’oku Habakuki yayehuliire obuyakagwize Yahwe ati: “Kiki onyoleka okutahiki’ra, norora ha butigi [okwendereza]?” (Hab. 1:3; 2 Tim. 3:1, 13) Kucumiitiriza ha bigambo bya Habakuki hamu n’ekyokurorraho kye eky’obwesigwa nikisobora kutukoonyera kugumisiriza obuturaaba nitulindirra ekiro kya Yahwe eky’aracweramu omusango.—2 Pet. 3:7.
2. Nitusobora tuta kwoleka ngu nitwikara tuli beesigwa omu kasumi kanu?
2 Ikara Oli Omwesigwa: Mukiikaro ky’okuhwa amaani habw’eby’akaba narabamu, Habakuki akaikara ali bulindaara omu by’omwoyo kandi akalinda obwesigwa bwe. (Hab. 2:1) Yahwe akaraganiza nabbi onu ngu akaba naija kuhikiriza Ebigambo Bye kandi ngu “anyakuhikiriire aliba mwomezi habwokwesigwakwe.” (Hab. 2:2-4) Ebigambo binu biine makuru ki hali Abakristaayo abali omu biro ebya ha mpero? Okugumya ngu empero eriija kiri ky’omugaso muno kukira n’okumanya ddi obw’eriija. Kuba n’okwikiriza kitukoonyera kusigara tuli bulindaara kandi kutukoonyera okwebembeza omulimo gw’okutebeza.—Baheb. 10:38, 39.
3. Habwaki twine kwikara tusemeri’rwe obuturaaba nituheereza Yahwe?
3 Ikara Osemeriirwe habw’Okuheereza Yahwe: Okwikiriza kwaitu kulirengesebwa muno akasumi Gogi, ow’omu nsi ya Magogi obwaliramagira abaheereza ba Yahwe. (Ez. 38:2, 10-12) Obulemu buleetera abo ababa basingwire ebizibu. Eby’okulya nibisobora kukeeha, abantu nibasobora kufeerwa ituungo lyabo, rundi enyikara n’esisikara. Tulyetwaza tuta ebizibu binu obubiritandika? Habakuki akaba amanyire ngu ebizibu nibiija kubaho, nahabwekyo akacwamu ngu naija kwikara naheereza Yahwe asemeriirwe. (Hab. 3:16-19) “Okusemererwa kwa Mukama” nikwija kukukoonyera kugumisiriza ebizibu eby’oratunga omu busumi obw’omu maiso.—Neh. 8:10; Baheb. 12:2.
4. Kusemere’rwa kwa mulingo ki okutusobora kutunga hati n’omu busumi oburukwija?
4 Abantu boona Yahwe araakiza ha kiro eky’omusango nibaija kwegesebwa kumanya emiringo ye. (Hab. 2:14) Abaliba bahumbuukiire nabo balyegesebwa ebirukukwata hali Yahwe. Nahati, leka tukozese buli mugisa gwona ogututunga kugambiraho abandi ebintu ebirungi Yahwe atukoliire.—Zab. 34:1; 71:17.