Emyaka Kikumi Niturangirra Obukama bwa Ruhanga!
1. Abakaiso ba Yahwe bakateererwa kukora ki emyaka kikumi erabireho?
1 “Murole, Omukama n’alema! Ninywe abakomerwe kumanyisa abantu ebirukumukwataho. Nahabwekyo, murangirre, murangirre, murangirre Omukama n’obukama bwe.” Ebigambo ebyo ebyabaziibwe Ow’oruganda Rutherford emyaka nka kikumi enyuma, bikekambisa Abakaiso ba Yahwe kurangirra Obukama bwa Ruhanga omu nsi yoona. Naitwe nugwo mulimo turukukora hati. Nk’Abakristaayo abaira, naitwe tutebiize amakuru amarungi ag’Obukama “omuli ebyahangirwe byona hansi yiguru.” (Bak. 1:23) Omu myaka kikumi erabireho, biki ebitukozere kurangirra Obukama bwa Ruhanga? Tusobora tuta kugumizamu nituburangira?
2. Ebitabu byaitu bikonyire bita kurangirra Obukama bwa Ruhanga?
2 Ebituhikiriize: Kumara emyaka, tubaire nitukozesa ebitabu byaitu kurangirra Obukama bwa Ruhanga. Kuruga omu mwaka 1939 tubaire nitukozesa magaziini: The Watchtower Announcing Jehovah’s Kingdom. Magaziini enu esoborra hali Obukama n’ekiburukwija kuhikiriza. Awake! nayo esoborra ngu Obukama bwa Ruhanga nubwo bwonka oburukwija kumaraho ebizibu by’abantu. Magaziini zinu nizo zikyakizire kuhindurwa n’okugabibwa omu nsi yoona!—Kus. 14:6.
3. Miringo ki izire n’ekozesebwa Abakaiso ba Yahwe kurangirra Obukama?
3 Abakaiso ba Yahwe baizire nibakozesa emiringo ey’enyahukana kurangirra Obukama bwa Ruhanga. Ira bakozesaaga emotoka eziroho emizindaro, guramufomu, kandi batekahoga na puroguramu ha rediyo. Omu busumi obu abatebezi baali bataito nahabwekyo emiringo egyo ekakonyera muno kuhikya amakuru amarungi ha bantu baingi. (Zab. 19:4) Hati tukozesa n’omukura gwaitu ogwa jw.org, ekisobozesiize obukaikuru n’obukaikuru bw’abantu harumu n’abo abali omu nsi nambere emirimo yaitu etarukwikirizibwa, kutunga amakuru ag’Obukama.
4. Miringo ki ey’embaganiza Abakaiso ba Yahwe eyi bakozesiize kutebeza?
4 Haroho emiringo endi ey’embaganiza Abakaiso ba Yahwe eyi bakozesiize kurangirra amakuru amarungi ag’Obukama. Nk’ekyokurorraho, kuruga omu myaka ya 1990, tukongeramu amaani omu mulimo gwaitu ogw’okutebeza nju ha nju, nitutebeza omu biikaro nambere abantu bakorra emirimo yaabu, omu paaka z’emotoka, n’omubiikaro ebindi nambere abantu baingi baba. Hati haroho okutebeza okw’embaganiza okutandikirweho, omu mbuga enkooto muno okwehinguliriza ensi. Kandi abatebezi abamu batunga obugali rundi obumeeza nambere bateeka ebitabu, nibabiteeka nambere abantu baingi bakira kuraba, omu biikaro byabu nambere baikara. Baitu kutebeza nju ha nju nugwo omulingo tukira kukozesa kuhikya hali abantu amakuru ag’Obukama.—Eng. 20:20.
5. Migisa ki eyeri omu mwaka omuhyaka ogw’obuheereza?
5 Ebiturukunihira omu Maiso: Omu mwaka ogw’obuheereza omuhyaka oguratandika omu Sebutemba, baingi nibaija kuheereza nka bapayoniya ab’akasumi koona. N’osobora kubeteranizaho? Ekyo obworaaba otarukukisobora, osobora kukora nka payoniya omukonyezi buli hanyuma y’akasumi? Obworaaba n’osobora kukora nka payoniya kirungi, baitu nobukiraaba kitasobokere, Yahwe naija kukuheereza emigisa ye habwokwefereza kwona okworaaba okozere kusobora kurangirra Obukama bwe.—Mara. 3:10.
6. Habwaki okwezi kwa Okitoba 2014 nikwija kuba kw’embaganiza?
6 Omu kwezi kwa Okitoba 2014, Obukama bwa Ruhanga bwija kuhikya emyaka 100 nibulema. Magaziini yaitu eta Watchtower ija kusoborra muno ha Bukama bwa Ruhanga okwezi oku. Tikyakubaire kirungi kukora kyoona ekirukusoboka kurora ngu twahikya magaziini enu ha bantu baingi? Nitulindirra obusumi obw’omu maiso, itwena ka tweyongere kurangirra amakuru amarungi ag’Obukama hali boona abarukugonza kuhuliriza.—Eng. 8:12.