ISOMO 11

Obutagasi

Abarumi 12:11

EKY’OSEMERIIRE KUKORA: Baza n’obutagasi nukwo abarukukuhuliiriza babe n’ekihika kandi banguhirwe kurora nk’oku basobora kuta omu nkora eby’orukwegesa.

OMULINGO OGW’OKUKIKORAMU:

Soborra kuruga ha mutima. Obworaaba notekaniza kuha orubazo rwawe, tekerezaaho muno omugaso gw’orubazo rwawe. Wetegereze kurungi ebiri omu rubazo rwawe nukwo osoborre kuruga ha mutima.
Tekerezaaho abarukukuhuliiriza. Wecumitirizeeho omulingo eby’orayegesa rundi eby’orasoma birukwija kugasira abarukukuhuliiriza. Tekerezaaho emiringo ey’osobora kusoborramu, ey’erabakonyera kurora omugaso gw’ebintu eby’orukubegesa.
Yegesa omu mulingo ogurukusemeza. Baza n’obwekambi. Kozesa ebicweka byawe eby’omubiri omu mulingo gwawe ogwa buli kiro kwoleka enyehurra yaawe.

Weriinde kuhugura abarukukuhuliriza habw’okukozesa ebicweka byawe eby’omubiri omu mulingo gumu gwonka. Kozesa kurungi ebicweka byawe eby’omubiri omu mulingo ogurukwetegerezebwa kurungi. Yoleka obutagasi kukira muno obwaraaba noyegesa ensonga enkuru rundi noyekambisa abarukukuhuliza kukora eky’orukubagambira. Otajwahya abarukukuhuliiriza habw’okwoleka obutagasi ekihinguraine.