Yesu Aliisa Abantu Baingi

Abakwenda bakagaruka kuruga omu kutebeza omu mwaka gwa 32 C.E. ekiro ky’Okuhingurwaho kitakahikire. Yesu akabatwara omu lyato omu kicweka ekirukwetwa Betesaida kusobora kuhumuraho habwokuba baali bajwahire. Baitu elyato obulyahikire haihi n’omusa gw’enyanja, Yesu akarora enkumi n’enkumi z’abantu abaali babahondiire. Yesu n’obwaraaba akaba nagonza kuba n’abakwenda be boonka, habw’embabazi ze atababinge. Akakiza abakaba barwaire kandi yatandika n’okubegesa. Yesu akamara ekiro kyona, n’ayegesa abantu ha Bukama bwa Ruhanga. Obwire obu bwahikire rwebagyo, abakwenda bakaija nambere ali bamugambira bati: ‘Abantu baine enjara. Baleke bagende nukwo basobole kutunga eky’okulya.’

Yesu yabagarukamu ati: ‘Tibaine kugenda. Mubahe eby’okulya.’ Abakwenda bakamukaguza: ‘Nogonza tugende tubagurre emigaati?’ Firipo, omu h’abakwenda akagamba ati: ‘Nobutwakubaire twine sente nyingi, titusobora kugurra abantu banu boona emigaati.’

Yesu akabakaguza ati: ‘Twine eby’okulya ebirukwingana nkaha?’ Andereya akamugarukamu ati: ‘Twine emigaati etaano hamu n’encu ibiri. Kandi binu tibirukutumara.’ Yesu akabagambira ati: ‘Mundetere emigaati egi hamu n’encu.’ Yesu akagambira abantu baikarre ha bunyansi omu bitebe eby’ataano ataano hamu na kikumi kikumi. Yesu akakwata emigaati n’encu kandi yarora ha iguru, yasaba. Hanyuma, yaha abakwenda eby’okulya nukwo basobole kubiha abantu. Abakazi, abaana hamu n’abasaija 5,000 boona bakalya baiguta. Kutasiisa eby’okulya ebikaba bisigaireho, abakwenda bakabisoroza. Bakasoroza ebigega 12 ebijwire kurungi. Eki kyali ky’amahano ky’amaani muno.

Abantu bakasemererwa muno kandi bagonza n’okufoora Yesu omukama wabo. Baitu Yesu akaba akimanyire ngu obwire bwa Yahwe kumufoora omukama bwali butakahikire. Nahabweki, akaraga abantu kandi yagambira abakwenda be kugenda ha rubaju orundi orw’Enyanja eya Galiraaya. Bakatemba elyato bagenda kandi Yesu uwe akagenda ha rusozi haiguru wenka. Habwaki? Habwokuba akaba nagonza kusaba. Yesu n’obwaraaba akaba aine bingi eby’okukora, yatungaga obwire obw’okusaba.