Omugo Omubi Afubirwa

Omukama Ahabu obu yabaga omu idirisa ly’ekikaali kye ekikaba kiri omu rubuga Yezereri, yaroraga omusiri ogw’emizabibu ogw’omusaija arukwetwa Nabosi. Omukama Ahabu akagonza muno omusiri gunu gw’emizabibu, kandi yasaba Nabosi agumuguze. Baitu, Nabosi akanga kugumuguza habwokuba kyali nikicwa ekiragiro kya Yahwe ekikaba nikitanga kutunda itaka ery’obugweteranwa. Notekereza Omukama Ahabu akatamu encwamu ya Nabosi ekitiinisa? Nangwa. Ahabu akabihirwa muno, yayanga kuruga omu kisiika kye, kandi yayanga n’okulya.

Omugo we omubi arukwetwa Yezeberi, akamugambira ati: ‘Niiwe mukama wa Isareri. N’osobora kutunga ekintu kyona ekyorukugonza. Ninyija kukutungira orugonjo rwa Nabosi.’ Yezeberi akahandiikira abakuru b’orubuga amabbaruha nabaragira kuhangirra Nabosi nibagamba ngu ajumire Ruhanga nukwo hanyuma bamutere amabale bamwite. Abakuru b’orubuga bakakora nk’oku Yezeberi yabaragiire, hanyuma Yezeberi yagambira Ahabu ngu: ‘Nabosi afiire. Orugonjo orw’emizabibu hati rwawe.’

Nabosi tali nuwe wenka ayaisirwe Yezeberi. Omugo onu akaita n’abantu bandi baingi abaramyaga Yahwe. Yaramyaga ebisisani kandi yakoraga ebintu bingi muno ebibi. Yahwe akarora ebibi byona Yezeberi ebiyakozere. Baitu hati, Yahwe yakumukozere ki?

Omukama Ahabu obuyafiire, obwire bukahika mutabani arukwetwa Yehoramu yafoka mukama. Yahwe akatuma omusaija arukwetwa Yehu kufubira Yezeberi n’eka ye.

Yehu akavuga ekigaali kye y’agenda Yezereri, nambere Yezeberi yaikaraga. Yehoramu akaija yatangana Yehu kandi yamukaguza ati: “Businge?” Yehu akamugarukamu ati: ‘Businge ki kandi kunu obusihani bwa nyoko Yezeberi n’oburogo bwe bwingi!’ Yehoramu akahindura ekigaali kye n’agonza kwiruka, baitu Yehu yamurasa akasaali yamwita.

Hanyuma, Yehu akagenda omu kikaali ky’Omugo Yezeberi. Baitu, Yezeberi obuyahuliire ngu Yehu naija, akekoraho, yayesiiga, yakora isoke rye kandi yagenda omu kisiika ekya haiguru omu idirisa. Yehu obuyaizire, Omugo yamuramukya n’ekyeju. Yehu akaragira abaheereza b’omugo abakaba bamuli haihi ati: “Mumunage hansi!” Omugo bakamunaga bamurabya omu idirisa yagwa hansi yafa.

Hanyuma, Yehu akaita batabani b’Omukama Ahabu 70 kandi ensi egi yoona yagimaramu okuramya kwa Baali, ruhanga ow’ebisuba. Norora omulingo Yahwe amanyire buli kintu kyona kandi n’omulingo afubira abantu abakora ebintu ebibi?