Bazaara Omwana ow’Obwojo!

Iburahimu na Sara bakaba bamazire emyaka nyingi omu buswere. Bakaba balekereho eka yabo enungi ey’omu rubuga rwa Uru batandikire kwikara omu hema. Baitu kinu Sara kitamukole kubi habwokuba akaba nayesiga Yahwe.

Sara akaba nagonza muno omwana. Niyo ensonga habwaki yagambire Iburahimu ngu: ‘Kakuba omuzaana wange Hagara azaara omwana, ninsobora kumubara nk’owange.’ Obwire bukahika Hagara yazaara omwana omwojo. Ibara ly’omwana onu niryo Isameri.

Emyaka nyingi obu yarabireho, Iburahimu obwakaba ahikize emyaka 99 kandi Sara aine emyaka 89, haroho abasaija basatu abababungiire. Iburahimu akabasaba kwikarra hansi y’omuti nukwo balye hamu ekiihuro. Omanyire abagenyi banu bakaba nubo baha? Bakaba bamaraika! Bakagambira Iburahimu bati: ‘Omwaka ogurukwija ha bwire nka bunu, iwe na mukazi wawe muliba mwine omwana omwojo.’ Sara akaba ali omu hema nahuliriza. Akaseka kandi yayekaguza ati: ‘Mali ninsobora kuzaara ha myaka yange enu?’

Omwaka ogwahondiireho, Sara akazaara omwana omwojo nk’oku maraika wa Yahwe akaba agambire. Iburahimu akamuruka ibara Isaka, ekirukumanyisa “Enseko.”

Isaka obu yahikize emyaka nk’etaano, Sara akarora Isameri n’asekereza Isaka. Habw’okugonza kutangira omwana we akabi, akagenda yasaba Iburahimu kubinga Hagara na Isameri. Ha kubanza, Iburahimu akaba atarukugonza kubabinga. Baitu Yahwe akagambira Iburahimu ati: ‘Huliriza Sara. Ninyija kurolerra Isameri. Baitu emirago yange nija kuhikirra omu Isaka.’