Akatebe Akalemi Kahikiriza Kata Emirimo Yaako Hati?

Omu kyasa eky’okubanza, abakwenda n’abagurusi omu Yerusalemu nubo bakoraga nk’akatebe akalemi, baina obujunanizibwa obw’okukora encwamu ez’amaani habw’ekitebe kyoona eky’Abakristaayo abaseserweho amagita. (Engeso 15:2) Kwetegereza kurungi Ebyahandiikirwe n’okuhondera okuterekerezebwa kw’omwoyo ogurukwera kyabakonyeraga kuhika ha ncwamu ehikire kandi enungi. (Engeso 15:25) Na hati, akatebe akalemi kahondera omulingo nugwo gumu.

Ruhanga akozesa akatebe akalemi kuhikiriza eby’agonza. Ab’oruganda abaseserweho amagita abali ha katebe akalemi bagonza muno Ekigambo kya Ruhanga kandi batendekerwe kurungi kukwatamu ensonga ez’eby’omwoyo rundi ez’ekitebe. Buli wiiki baikaara kurora ebyetaago by’ab’oruganda omu nsi yoona. Nkoku kyaali omu kyasa eky’okubanza, akatebe akalemi kahereza ab’oruganda obuhabuzi nibusigikirra ha Byahandiikirwe kuraba omu mabbaruha, abarolerezi ababungira ebitebe rundi omu miringo endi. Kinu kiretaho obumu omu ntekereza ya bantu ba Yahwe. (Engeso 16:4, 5) Akatebe akalemi karolerra omulimo gw’okutekaniriza ab’oruganda ebyokulya eby’eby’omwoyo, kebembera omulimo gw’okutebeza, kandi kahereza amagezi agasigikirwaho kukoma ab’oruganda omu biikaro eby’obuhereza.

Kahondera okuterekerezebwa kw’omwoyo gwa Ruhanga. Akatebe akalemi kaserra amagezi kuruga hali Yahwe Omulemi w’Obuhangwa bwona, na Yesu Omutwe gw’ekitebe. (1 Abakolinso 11:3; Abefeso 5:23) Ab’oruganda abali ha katebe kanu tibetwara kuba nubo bebembezi ba bantu ba Ruhanga. Ubo, n’Abakristaayo abandi boona abaseserweho amagita “bakuratira Omwana gwentama nambere agenda hona.” (Okusuku’rwa 14:4) Ab’oruganda abali ha katebe akalemi basiima muno obu tubasabira bakongera kukora emirimo yaabu kurungi.

• Nibaha ababaire ha katebe akalemi omu kyasa eky’okubanza?

• Akatebe akalemi kaserra kata obwebembezi bwa Ruhanga hati?