Isomo 9

Abaheereza ba Ruhanga Basemerire Kuba Beecumi

Habwaki tusemerire kuba abeecumi omu buli mulingo? (1)

Nikimanyisa ki kuba abeecumi omu by’omwoyo? (2)

abeecumi omu ngeso? (3) abeecumi omu bitekerezo? (4) abeecumi omu mubiri? (5)

Mbaza ya mulingo ki etasemiire eyitusemerire kwehara? (6)

1. Yahwe Ruhanga mweecumi kandi ali arukwera. Nagonza abahereza be kwikara bali beecumi—omu by’omwoyo, omu ngeso, omu bitekerezo, n’omu mubiri. (1 Petero 1:16) Nikitwetaagisa kwekamba kwikara tuli beecumi omu maiso ga Ruhanga. Tuli omu nsi etali nyeecumi. Kandi twina kurwanisa emiringo yaitu etuletera kukora kubi. Titwina okujwaha.

2. Obweecumi omu by’Omwoyo: Obuturaba nitugonza kuhereza Yahwe, titusobora kugumanganira ha nyegesa yona n’emikoro y’amadiini ag’ebisuba. Twina kugarugamu amadiini ag’ebisuba kandi tutagasagika omu mulingo gwona. (2 Abakolinso 6:14-18; Okusuku’rwa 18:4) Tumazire kwega amananu agarukukwata hali Ruhanga twina kwegendereza butahabisibwa abantu abegesa ebisuba.—2 Yohana 10, 11.

3. Engeso Enyeecumi: Yahwe nagonza abantu be abamuramya betwale nk’Abakristaayo aba mananu obwire bwona. (1 Petero 2:12) Arora buli ekiturukukora, gonze n’omunsita. (Abaheburaniya 4:13) Twina kwehara obusihani nebikorwa ebitasemire ebyensi enu.—1 Abakolinso 6:9-11.

4. Obweecumi Omubitekerezo: Kakuba twijuza ebitekerezo byaitu nebintu ebiyonjo, ebisemire mali, n’engeso zaitu zija kuba nyeecumi. (Abafiripi 4:8) Baitu kakusangwa twemali’ra habintu ebitali byeecumi, kija kuturugiramu ebikorwa ebibi. (Matayo 15:18-20) Tusemerire kwehara eby’okwesemeza ebikusobora kusiisa ebitekerezo byaitu. Tusobora kwijuza ebitekerezo byaitu nebintu ebirungi nitwesomesa Ekigambo kya Ruhanga.

5. Obweecumi bw’Omubiri: Habw’okuba bali ngabwa za Ruhanga, Abakristaayo basemerire kulinda emibiri yabu neby’okujwara byabu biri byeecumi. Tusemerire kunaaba omu ngaro turugire omu kyolooni, kandi twina kuzinaaba tutakabaire kulya rundi kukwata haby’okulya. Obworaba otaina kikaro ekihikire eky’okusiisamu obubi, busemerire kuziikibwa. (Ekyebiragiro 23:12, 13) Kulinda emibiri yaitu eri nyeecumi kituletera kuba n’obwomezi oburungi. Amaka g’Omukristayo gasemerire kuba ameecumi omunda n’aheru. Gasemerire kuba eky’okurorraho ekirungi omu kicweka kyakwikaramu.

6. Embaza Enyeecumi: Abahereza ba Ruhanga basemerire kubaza amananu buli bwire. Ab’ebisuba tibalitaaha omu Bukama bwa Ruhanga. (Abefeso 4:25; Okusuku’rwa 21:8) Abakristaayo tibakozesa kalimi kabi. Tibahuliriza kusandaara kw’ebigambo ebibi rundi enganikyo ezitali nyeecumi. Habwembaza yabu enyeecumi baba benyahukana ha mulimo rundi ha’isomero n’omubataahi.—Abefeso 4:29, 31; 5:3.

[Ebisisani ekiri ha rupapura 18, 19]

Abahereza ba Ruhanga basemerire kuba beecumi mu buli mulingo