Yesu Ayegeseza Ha Rusozi

DORA Yesu aikaliire hanu. Nayegesa abantu banu boona ha rusozi mu Galiraya. Abo abamwikalire haihi begeswa be. Akomere mu bo 12 okuba abakwenda be. Abakwenda bali abegeswa be ab’embaganiza. Omanyire amabara gabu?

Haroho Simoni Petero na mugenziwe Andereya. Haroho Yakobo na Yohana, nabo nyinemu. Omukwenda ondi nawe ayetwa Yakobo kandi nondi ayetwa Simoni. Abakwenda babiri nibetwa Yuda. Omu nuwe Yuda Isikalyota kandi Yuda oli ondi obundi ayetwa Tadeo. Hanyuma haroho Firipo kandi na Nasaneri (obundi ayetwa Baturumayo), na Matayo na Tomasi.

Obu yagarukire kuruga Samalia, murundi gw’okubanza Yesu akatandika kwegesa ati: ‘Obukama bw’omwiguru bwirire haihi.’ Omanyire obukama nikyo kiki? Nibwo bulemi bwonyini obwa Ruhanga. Yesu nuwe Mukama wabwo. Aija kulema ali mu iguru kandi aija kuleta obusinge ha nsi. Obukama bwa Ruhanga nibwija kuhindura ensi yoona kuba orugonjo orurungi muno.

Yesu hanu nayegesa abantu ha bukama. Nabasoborra: ‘Kunu nukwo musabege muti, Isitwe ali omu iguru, ibara lyawe dyezebwe. Obukama bwawe bwije. Ebyogonza bikorwe mu nsi nkoku bikorwa omu iguru.’ Enu abantu baingi bagyeta ‘Esara ya Mukama waitu.’ Abandi bagyeta ‘esara eya Isitwe.’ Osobora kugarukamu esara enu yoona?

Yesu kandi nayegesa abantu nkoku basemerire kutwazangana. Akagamba: ‘Korraga abandi nkoku orukwenda bakukorrege.’ Tosemererwa abandi obu bakutwaza n’embabazi? Kale, Yesu nagamba ngu tusemerire kutwaza abantu abandi n’embabazi. Tikikwija kuba kirungi obu buli muntu aliba naakora ati mu rugonjo rwa Ruhanga omu nsi?