Baibuli Eyegesa ngu Ensi Eterekeriire?

Eky’okugarukamu kuruga omu Baibuli

Nangwa, Baibuli teyegesa ngu ensi eterekeriire.a Baibuli tikiri kitabu kya sayansi. Baitu ha murundi nugwo gumu, tehakaniza ebyazoirwe abanyasayansi. Baibuli eby’egamba bihikire “ebiro nebiro.”—Zabuli 111:8.

Baibuli eba n’emanyisa ki obw’ebazaaho ‘ensonda ina ez’ensi’?

Sitaani akaba namanyisa ki obw’akaba nayohya Yesu?

Baibuli eba n’emanyisa ki obw’ebazaaho ‘ensonda ina ez’ensi’?

Ebigambo, “ebyebu bina ebyensi” rundi ensonda ina ez’ensi hamu na “empero ezensi” ebirukukozesebwa omu Baibuli, tibirukumanyisa ngu ensi eri nk’emeeza enyakwine ensonda ina rundi ngu ine nambere erukugarukira. (Isaya 11:12; Yobu 37:3) Baitu ebigambo binu bikozesebwa kumanyisa ensi yoona. Baibuli ebazaaho ensonda ina ez’ensi kumanyisa ensi yoona.—Luka 13:29.

Ekigambo ky’Oruheburaniya ekihindurwa nka “ensonda” rundi “empero” kiri kigambo ekiine amakuru agahamire kandi kiine akakwate n’ekigambo ekikozesebwa kumanyisa “amapapa.” Ekitabu The International Standard Bible Encyclopedia, kigamba ngu “habwokuba ekinyonyi kikozesa amapapa gakyo kuswekerra obwana bwakyo, [ekigambo kinu eky’Oruheburaniya] kisobora kumanyisa kwanjurra ekintu kuhikya kihoireyo.” Ekitabu nikyo kimu kigamba ngu omu Yobu 37:3 na Isaya 11:12, “ekigambo kinu nikisobora kumanyisa emyaro, emitaano, rundi ebicweka by’ensi ebiri hara muno.”b

Sitaani akaba namanyisa ki obw’akaba nayohya Yesu?

Sitaani obwakaba nayohya Yesu, “akamutwara ha rusozi oruraihire muno, yamwoleka obukama bwona obwomunsi zona, nekitinisa kyabwo.” (Matayo 4:8) Abantu abamu bagamba ngu orukarra runu nirumanyisa ngu nikisoboka kwemerra omu kiikaro kimu okarora ensi yoona eyeterekeriire. Baitu, nizooka ngu “orusozi oruraihire muno” orurukubazibwaho omu rukarra runu tikiri kiikaro ekirukurorwa n’amaiso. Wetegereze ensonga habwaki nitugamba tuti.

● Busaho rusozi rwona omu nsi nambere omuntu asobora kwemerra akarora obukama bwona obw’omu nsi.

● Sitaani atagarukire ha kwoleka Yesu obukama bwona baitu akamwoleka n’ekitiinisa kyabwo. Ebintu ebi, omuntu tasobora kubirora kurungi kakuba biba bimuli hara muno. Nahabweki nikisoboka kuba ngu Sitaani akooleka Yesu ebintu binu kuraba omu kwolekwa. Kinu nitusobora kukirengesaniza n’omulingo omuntu akozesa purojekita rundi tiivi kwoleka omuntu ondi ebisisani by’ebiikaro ebirukwahukana omu nsi.

● Omu Luka 4:5 nihooleka ngu Sitaani akooleka Yesu ‘obukama bwona obwomu nsi zona omu kicu kike,’ kandi Yesu tiyakusoboire kurora ebintu binu omu kasumi kake muno kakuba akaba narora n’amaiso aga buli kiro. Kinu nikyoleka ngu haroho omulingo ogundi Sitaani oguyakozeseze kwoleka Yesu ebintu binu hatali maiso h’amaiso.

[OBUGAMBO OBULI HANSI]