Yerusalemu Oruhyaka Nikyo Kiki?

Eky’okugarukamu kuruga omu Baibuli

Ekigambo “Yerusalemu Oruhyaka,” ekirukusangwa omu Baibuli emirundi ebiri, ruli rubuga orw’akokurorraho orukukiikirra guruupu y’abahondezi ba Yesu abagenda omu iguru kulema nauwe omu Bukama bwa Ruhanga. (Okusuku’rwa 3:12; 21:2) Baibuli n’eyoleka ngu guruupu enu n’esobora n’okwetwa omugole wa Kristo.

Ebintu Ebiratukonyera Kumanya Yerusalemu Oruhyaka

1. Yerusalemu Oruhyaka ruli omu iguru. Buli murundi Baibuli ebazaaho Yerusalemu Oruhyaka, erubazaaho nk’orukusirimuka kuruga omu iguru, nambere bamalaika balinda emiryango yarwo. (Okusuku’rwa 3:12; 21:2, 10, 12) Ekindi, obukooto bw’orubuga runu nibwoleka ngu tirusobora kuba ruli omu nsi. Buli rubaju nirwinganaingana ‘Esitadyo 12000.’ a (Okusuku’rwa 21:16) Nahabweki, oburaiha bwarwo kugenda omu iguru nibwinganaingana kilomita nka 560 (rundi mairo 350).

2. Yerusalemu Oruhyaka nirutwarramu guruupu y’abahondezi ba Yesu rundi omugole wa Kristo. Yerusalemu Oruhyaka nirwetwa “omugole, nuwe omukazi Womwana Gwentama.” (Okusuku’rwa 21:9, 10) Omu kusoborra kunu okw’akokurorraho, Omwana gw’Entaama nigumanyisa Yesu Kristo. (Yohana 1:29; Okusuku’rwa 5:12) “Omukazi Womwana Gwentama,” rundi omugole wa Kristo, nakikirra Abakristaayo abalyeteranizaaho Yesu omu iguru. Baibuli erengesaniza enkoragana enyakuli hagati ya Yesu n’Abakristaayo banu n’enkoragana enyakuli hagati y’omusaija na mukazi we. (2 Abakolinso 11:2; Abefeso 5:23-25) Kwongerraho, amabaale ag’omusingi gwa Yerusalemu Oruhyaka gahandiikirweho “amabara ikumi nabiri, agabakwenda ikumi nababiri Abomwana Gwentama.” (Okusuku’rwa 21:14) Ebigambo binu nibitukonyera kumanya Yerusalemu Oruhyaka, habwokuba Abakristaayo abakomwa kugenda omu iguru ‘bombekerwe ha miganda yabakwenda nabanabi.’—Abefeso 2:20.

3. Yerusalemu Oruhyaka ruli kicweka kya gavumenti. Yerusalemu yakara rukaba ruli rubuga orukuru orwa Isaleri, nambere Omukama Daudi, mutabani we Sulemani, hamu n’abaijukuru baabo abalemere “ha kitebe kya [Yahwe].” (1 Ekyebyomubusinge 29:23) Yerusalemu, n’eyetwa “orubuga orurukwera,” orwakikirraga Obulemi bwa Ruhanga kuruga omu ruzaaro rwa Daudi. (Nehemiya 11:1) Yerusalemu Oruhyaka, ahandi orumanyirwe ‘nk’orubuga orurukwera,’ nirutwarramu abantu abarukwija kweteranizaaho Yesu omu iguru kulema ensi nk’abakama.—Okusuku’rwa 5:9, 10; 21:2.

4. Yerusalemu Oruhyaka ruletera abantu ab’omu nsi emigisa. Yerusalemu Oruhyaka rubazibwaho ‘nk’orukusirimuka kuruga omu iguru hali Ruhanga,’ ekirukwoleka ngu Ruhanga arukozesa omu nsonga eziri aheru y’iguru. (Okusuku’rwa 21:2) Ebigambo binu nibyoleka ngu haroho akakwate hagati ya Yerusalemu Oruhyaka n’Obukama bwa Ruhanga, Ruhanga obw’akozesa kuhikiiriza ebigendererwa bye omu iguru n’omu nsi. (Matayo 6:10) Ekigendererwa kya Ruhanga hali abantu omu nsi nikitwarramu emigisa enu:

● Kwihaho ekibi. “Ekyambu ekyamaizi agobwomezi” kigera kuruga omu Yerusalemu Oruhyaka kandi kiha amaizi ‘emiti ey’obwomeezi’ ‘ey’okukiza amahanga.’ (Okusuku’rwa 22:1, 2) Okukizibwa kunu okw’omubiri n’omwoyo nikwija kwihaho ekibi kandi kusobozese abantu kutunga obwomeezi obuhikiriire nk’oku Ruhanga akaba akitekaniize kara.—Abarumi 8:21.

● Enkoragana enungi hagati ya Ruhanga n’abantu. Ekibi kiretiire abantu kuruga hali Ruhanga. (Isaya 59:2) Ekibi obukiraihwaho nikiija kusobozesa obunabbi bunu kuhikirra omu bwijwire, oburukugamba ngu: “Ehema ya Ruhanga eri hamu nabantu, kandi araikaraga nabo, kandi baliba bantube, kandi Ruhanga wenka araikaraga nabo Ruhanga wabu.”—Okusuku’rwa 21:3.

● Okubonabona n’okufa nibiija kuhwaho. Obu nakozesa Obukama bwe, Ruhanga “alisusura amaizi gona hamaiso gabu; kandi tihakiroho okufa; nobukwakuba okutera empamo, nobukwakuba oku’ra, nobukwakuba okusasa tibikiroho.”—Okusuku’rwa 21:4.