Okuzaarwa Obwakabiri Nikimanyisa Ki?

Eky’okugarukamu kuruga omu Baibuli

Ebigambo “okuzarwa obwakabiri” nibimanyisa entandikwa empyaka ey’enkoragana hagati ya Ruhanga n’omuntu ow’azairwe obwakabiri. (Yohana 3:3, 7) Ruhanga atwara abo abazairwe obwakabiri nk’abaana be. (Abarumi 8:15, 16; Abagaratiya 4:5; 1 Yohana 3:1) Kusisanaho n’abantu ababa batwairwe omu butongole kukuzibwa abazaire abahyaka, n’abazairwe obwakabiri okunihira kwabo kuhinduka kandi bafooka kicweka ky’eka ya Ruhanga.—2 Abakolinso 6:18.

Habwaki omuntu azaarwa obwakabiri?

Yesu akagamba ati: “Omuntu obwatazarwa obwakabiri tasobora kubona obukama bwa Ruhanga.” (Yohana 3:3) Nahabweki kuzaarwa obwakabiri kiba nikiteekaniza omuntu kulema hamu na Kristo omu Bukama bwa Ruhanga. Obukama nibulemera omu iguru, nahabweki Baibuli ebazaaho ‘okuzaarwa obwakabiri’ nk’ekintu ekireetera omuntu obugwetwa ‘obunyakwahwirwe omu iguru.’ (1 Petero 1:3, 4) Abo abazaarwa obwakabiri bagumibwa ngu nibaija kulema hamu na Kristo nk’abakama.—2 Timoseo 2:12; 2 Abakolinso 1:21, 22.

Omuntu azaarwa ata obwakabiri?

Yesu obuyabalizeeho ensonga enu, akagamba ngu abo abakuzairwe obwakabiri ‘bakuzairwe amaizi n’omwoyo.’ (Yohana 3:5) Ebigambo binu nibimanyisa okubatizibwa omu maizi okuhonderwaho okubatizibwa n’omwoyo ogurukwera.—Engeso Ezabakwenda 1:5; 2:1-4.

Yesu nuwe omuntu ayabandize kuzaarwa obwakabiri. Akabatirizibwa omu Kyambu Yorudani, kandi hanyuma Ruhanga yamuseesaho amagita (rundi yamubatiza) n’omwoyo ogurukwera. Omu mulingo ogu, Yesu akazaarwa obwakabiri n’omwoyo ogurukwera nk’omwana wa Ruhanga ow’aine okunihira okw’okugaruka omu iguru. (Marako 1:9-11) Okunihira oku Ruhanga akakuhikiriza obuyahumbwire Yesu nk’ekihangirwe eky’omwoyo.—Engeso Ezabakwenda 13:33.

N’abandi abazaarwa obwakabiri nabo babatizibwa omu maize batakatungire omwoyo ogurukwera.a (Engeso Ezabakwenda 2:38, 41) Obu nubwo batunga okunihira okw’okugenda omu iguru, Ruhanga okwalihikiriza hanyuma y’okuhumbuuka.—1 Abakolinso 15:42-49.

Ebisuba ebirukukwata ha kuzaarwa obwakabiri

Ekisuba: Omuntu n’asobora kwecweramu kuzaarwa obwakabiri.

Amananu: Buli muntu aine omugisa ogw’okuba n’enkoragana enungi na Ruhanga n’ogw’okutunga okujunwa. (1 Timoseo 2:3, 4; Yakobo 4:8) Baitu Ruhanga nuwe akomamu abo abasemeriire kuzaarwa obwakabiri rundi abaseserweho amagita n’omwoyo ogurukwera. Kusigikirra ha Baibuli, kuzaarwa obwakabiri “tikiri kyogu anyakwenda, nobwakuba anyakwiruka, baitu kya Ruhanga.” (Abarumi 9:16) Ebigambo “okuzarwa obwakabiri” nibisobora n’okumanyisa kuzaarwa kuruga ha iguru, ekirukugumya ngu okukomwa kw’abo abarukuzaarwa obwakabiri kuruga ha iguru rundi hali Ruhanga.