Manayeni—Akeebembeza Ebintu eby’Omwoyo

Manayeni akaba omu h’ab’oruganda abaali nibeebembera omu kitebe kya Antyokiya eky’omu kyasa eky’okubanza. ‘Akeegesebwa hamu na Herodi omulemi w’isaza.’ (Ebik. 13:1) Nahabweki Manayeni akaba musaija ow’asomere muno, kandi naasobora kuba yakuliire omu ka y’abaguuda.

Noobu kiraaba ngu akakurra omu nyikara nk’ezi, akacwamu kufooka Mukristaayo kandi yasagika ekitebe. Nkooku tusangirwe turozere, Manayeni akaba asomere muno kandi akaba amanyire abantu rurangaanwa, baitu eki noobu kiraaba nukwo kyabaire, atabikozese kwegasira wenka. Oihireho, akacwamu kuheereza ab’oruganda bagenzi be.

Ekyokurorraho kya Manayeni nikyoleka ngu kuheereza Yahwe nikikira kuba muntu rurangaanwa rundi kuba na sente nyingi. Kusisanaho na Manayeni, tusemeriire kwebembeza ebintu eby’omwoyo omu kiikaro ky’okwebembeza kuserra itungo rundi kuba rurangaanwa omu nsi enu eya Sitaani. (Mat. 6:33) Ekindi, noobu kiraaba ngu kutunga obwegese tikiri kibi, tusemeriire “kumanya ebintu ebirukukirayo obukuru” kandi tukigumye ngu ebintu ebindi tibyatulemesa kuramya Yahwe.—Baf. 1:9, 10.