Nikisoboka Kutunga Obusinge Noobu Haraaba Haroho Obulemu n’Okurwana
Gary ow’akaba ali omu mahe naagamba ati: “Obu nkaba ntakatandikire kwega Baibuli, nkaba ntamanyire habwaki haroho ebintu ebibi bingi, obutali bwinganiza, n’ebizibu bingi omu nsi. Baitu hati nyine obusinge omu biteekerezo. Ninkimanya ngu Yahwe naija kufoora ensi ekiikaro ekirungi eky’okwikaramu.”
Gary tali nuwe wenka arukwehurra ati. Teekerezaaho omulingo Baibuli ekonyiire abantu abandi.
BAIBULI EGAMBA ETI: “Baitu iwe [Yahwe], oli murungi, orahuka okuganyira.”—Zabuli 86:5.
OMULINGO KIMUKONYIIRE: “Orukarra runu rungumya ngu Yahwe w’embabazi. Nkimanyire ngu ayeteekaniize kunganyira habw’ebi byona ebi nakozere obu nayejumbiire omu bulemu.”—Bikagambwa Wilmar, kuruga Colombia.
BAIBULI EGAMBA ETI: “Nimpanga iguru erihyaka nensi empyaka: nebigambo bya kara tibiriijukwa, kunu tibiritaha omu mutima.”—Isaya 65:17.
OMULINGO KIMUKONYIIRE: “Habw’ebintu ebibi ebyampikireho obu nkaba ndi omu mahe, nkarwara oburwaire bw’omutwe n’okwenuuba. Baitu ekyahandiikirwe kinu kinyijukya ngu omu bwire obutali bwa hara, Yahwe naija kunkonyera kwebwa ebintu binu ebibi ebyampikireho. Tibiryongera kwija omu biteekerezo byange rundi omu mutima gwange. Mali eki ka kirungi!”—Bikagambwa Zafirah, kuruga United States.
BAIBULI EGAMBA ETI: “Omu birobye abahikiriire balibona omugisa; nobusinge bwingi okuhikya okwezi obukulihwaho.”—Zabuli 72:7.
OMULINGO KIMUKONYIIRE: “Nkira kuteekerezaaho ebigambo ebi. Omu bwire obutali bwa hara obulemu n’ebintu ebibi nibiija kuba bihoireho kandi titulyongera kweraliikirra habw’obwomeezi bw’abantu baitu.”—Bikagambwa Oleksandra, kuruga Ukraine.
BAIBULI EGAMBA ETI: “Abafu bawe baliba bomezi. . . . Musisimuke, muzine inywe abataha omu cucu.”—Isaya 26:19.
OMULINGO KIMUKONYIIRE: “Haihi abanyabuzaale bange boona bakafeera omu kiita bantu, oruganda rumu obu rukaba nirwita abantu ab’oruganda rw’Abatutsi. Baitu orukarra runu nirungumya ngu ninyija kwongera mbarole. Mali nyine ekihika eky’okuhurra amaraka gaabo ag’okusemererwa obu balihumbuuka!”—Bikagambwa Marie, kuruga Rwanda.
BAIBULI EGAMBA ETI: “Baitu hasigaireho akacu kake omubi alihera . . . Baitu abaculezi baligwetwa ensi; balikyanganuka obwobusinge obwingi.”—Zabuli 37:10, 11.
OMULINGO KIMUKONYIIRE: “Noobu kiraaba ngu obulemu bukahwa, hakyaroho obutali bwinganiza hamu n’abantu ababi. Enkarra zinu zinkonyiire muno. Yahwe naarora buli kimu kandi naamanya enyikara yange. Naaraganiza ngu omu bwire obutali bwa hara okubonabona kwona nikwija kuhwaho kandi kwebe.”—Bikagambwa Daler, kuruga Tajikistan.
Abantu ababazibweho omu magaziini enu bali bamu ha bukaikuru n’obukaikuru bw’Abakaiso ba Yahwe abakonyiirwe Baibuli kutunga obusinge. Beegere omulingo basobora kusingura okusoroora omu rangi, omu mahanga, enganda, hamu n’enobi. (Abefeso 4:31, 32) Abakaiso ba Yahwe tibagwera rubaju omu by’obulemi kandi beetantara kurwana.—Yohana 18:36.
Abakaiso ba Yahwe basagikangana nk’eka emu. (Yohana 13:35) Ekyokurorraho, Oleksandra, ou tubalizeeho, uwe na munyaanya bakairukira omu ihanga erindi habw’obulemu. Naagamba ati: “Obutwacwanganiize omutaano, ahonaaho tukarora Abakaiso ba Yahwe abandi abakaba baizire kututangirra. Habw’obusagiki bwabo tukasobora kumanyiira enyikara ez’ihanga erindi obu tukaba tuli nsuhuuki.”
Abakaiso ba Yahwe nibakuraaliza kwija kubeeteranizaaho omu nsorrokano zaabo nambere beegera obutumwa bwa Baibuli obw’obusinge n’omulingo basobora kubuta omu nkora. Genda ha jw.org kumanya Ekyombeko ky’Obukama ekikuli haihi rundi kusaba kwegesebwa Baibuli hataroho kusasura sente, nookozesa ekitabu Wegondeze omu Bwomeezi Ebiro n’Ebiro!