Kiki Ekisobora Kutukonyera Kwesomesa Butoosa
KIKUGUMIRA kwesomesa Baibuli butoosa n’okukwegondezaamu? Itwena kiine kuba kitugumira obwire obumu. Baitu tekerezaaho ebintu ebindi ebi tukora butoosa, nkw’okwoga. Okwoga kwetaagisa obwire n’amaani, baitu hanyuma, twehurra kurungi! Kwesomesa Baibuli nakwo nikusobora kutuleetera kwehurra kurungi. (Bef. 5:26) Tekerezaaho amagezi agamu agasobora kukukonyera:
Kora enteekaniza. Kwesomesa Baibuli kiri kimu ha bintu ‘ebirukukirayo obukuru’ buli Mukristaayo weena eki asemeriire kukora. (Baf. 1:10) Kusobora kukukonyera kuhondera entekaniza yaawe, habwaki otagihanika nambere kirukukwanguhira kugirora nka ha kisiika? Rundi nosobora kuteekamu alamu omu simu yaawe ey’erakwijukya nihaburayo obwire buke obwire bwawe obw’okwesomesa buhike.
Ikara n’ohindura obwire n’omulingo ogw’okwesomesa. Nikikwanguhira kuteekaho omutima obu orukuba noyesomesa, kumara akasumi akaraihire, rundi kumara obwire buke? Niiwe arukumanya ekirukukira kukukorra. Hinduramu omulingo oyesomesaamu nk’oku kisemeriire. Kakuba oba noyehurra otarukugonza kwesomesa akaire obu kahika, habwaki otacwamu kwesomesa habw’edakiika ikumi zonka? N’obu oyesomesa n’obu kaakuba akaire kake, nikikira kutesomesa. Kandi obundi hanyuma y’okumara edakiika ikumi n’oyesomesa, nikisobora kukwekambisa kugumizaamu noyesomesa habw’akaire akaraihire.—Baf. 2:13.
Tekerezaaho eki orayesomesaaho kara. Kakuba otekerezaaho eki orayesomesaaho omu kaire konyini ak’okwesomesa, kimanye ngu ‘torukukozesa kurungi obwire bwawe.’ (Bef. 5:16) Habwaki otahandiika ebicweka rundi amasomo agawakugondeze kwesomesaaho? Ekyokurorraho, obu oraaba oine ekikaguzo ekirukukwata ha kintu eki otarukwetegereza kurungi, kihandiike. Kandi hanyuma y’okumara kwesomesa, nosobora kwongeraho ebintu ebindi ha rukarra rwawe ebi wakugondeze kwesomesaaho.
Ba muntu ow’arukuhindahinduramu. Ekintu ekikuru nikyo kurora ngu wayesomesa butoosa. Kinu kusobora kukikora, lengaho kuhindahinduramu ekiro hamu n’obwire obw’okwesomesa, obwire obu omara noyesomesa rundi ebintu ebi oyesomesaaho.
Mali tugasirwa obu twesomesa butoosa. Kitukonyera kwirra haihi na Yahwe, twega kukora encwamu ez’amagezi kandi kituleetera kwehurra kurungi.—Yos. 1:8.