Obaire Okimanyire?
Habwaki kyali kirungi Yahwe kwikiriza Abaisaleri kuhonga enduka rundi amaiba?
HANSI y’Ebiragiro bya Musa, Abaisaleri baali nibaikirizibwa kuhonga hali Yahwe enduka rundi amaiba. Ebinyonyi binu bibiri byakiraga kubazibwahoga hamu omu biragiro ebirukukwata ha bihongwa, kandi kimu kyakozesebwaga ekindi obukyabaga kitaroho. (Lev. 1:14; 12:8; 14:30) Habwaki kinu kyali ky’omugaso? Ensonga emu eri ngu obwire obumu enduka tizazookaga. Habwaki?
Enduka
Enduka nizisangwa omu Isaleri yoona omu meezi ag’obutagasi. Baitu omu Okitobba, obutiti obubwija enduka zifuruka zigenda omu mahanga ag’Omumasirimuka nambere hali obutagasi, kandi zigaruka omu Isaleri obutiti obubuhwaho. (Yer. 8:7) Kinu nikimanyisa ngu omu Isaleri eya kara, kyali nikigumira Abaisaleri kutunga enduka ez’okuhonga omu bwire obw’obutiti.
Eriiba
Baitu go amaiba tigakiraga kufuruka, nahabweki gabahoga obwire bwona omu Isaleri. Kandi ekindi abantu baatungaga amaiba omu maka gaabo. (Lengesaniza na Yohana 2:14, 16.) Kusigikirra ha kitabu Bible Plants and Animals, “ebyaro byona hamu n’etawuni omu Palestine bikaba birumu amaiba agatungirwe omu maka. Buli ka ekaba eine ekiju ky’amaiba rundi ekihuru omu kisiika nambere amaiba gaikaraga”—Lengesaniza Isaya 60:8.
Eriiba liri omu kiju kya lyo
Omu mulingo gunu, Yahwe akooleka okugonza hamu n’okwetegereza kurabira omu kwikiriza Abaisaleri kuhonga ebinyonyi ebibakaba nibasobora kutunga akaire koona.