Omulingo Abantu Babazaaho Okusaba
“Obunsaba, nyehurra oti rundi Ruhanga ali ha rubaju rwange, ankwasire ha mukono, n’ampabura obumba nsobiirwe.”—MARÍA.
“Mukazi wange akafa hanyuma y’okumara emyaka 13 n’atalibanizibwa oburwaire bwa kansa. Ninyijuka, nasabaga Ruhanga buli kiro, kandi nkehurra ngu mali akaba n’ampuliiriza omu bujune bwange. Kandi nkehurra nyine obusinge.”—RAÚL.
“Okusaba kisembo kirungi muno, Ruhanga ekiyahaire abantu.”—ARNE.
Hali María, Raúl, Arne, hamu n’abandi, kusaba kisembo ky’embaganiza. Nibehurra ngu kurabira omu kusaba, nibasobora kubaza na Ruhanga, kumusiima, kandi n’okumusaba obukonyezi. Nibakigumiza kimu n’omutima gw’abo gwona ngu Baibuli eky’erukugamba ha kusaba hali Ruhanga kihikiire kimu. N’egamba eti: “Bunu nubwo bumanzi obutunyina namberali ngu obutusaba ekintu kyona nkokwagonza atuhurra.”—1 Yoh. 5:14.
Baitu, abantu baingi kibagumira kwikiriza Baibuli eky’erukugamba ha kusaba. Steve n’asoborra omulingo yayehurramuga ha kusaba. Nagamba ati: “Obunahikize emyaka 17, banywani bange basatu bakafeera omu butandwa bw’emiringo ebiri. Omu akafeera omu butandwa bwa motoka, kandi abandi babiri bakafeera omu nyanja.” Kiki Steve ekiyakozere? Nagamba ati: “Nk’asaba Ruhanga ansoborre habwaki ebintu ebi byona byali bibaireho, baitu atagarukemu. Nahabweki nkekaguza nti, ‘Habwaki nsaba?’” Abantu baingi habw’okwehurra ngu esaara zaabo tizigarukwamu, bekaguza obukiraaba kiine omugaso kugumizaamu nibasaba.
Haroho n’esonga ezindi ezireetera abantu kwehurra ngu tikiri ky’omugaso kusaba. Abamu bagamba ngu nk’oku Ruhanga amanyire buli kimu kyona, amanyire ebyetaago hamu n’ebizibu byaitu, nahabweki tikirukugasa kwongera kubimugambira.
Abandi nibatekereza ngu Ruhanga tarukugonza kuhurra esaara zaabo habw’ensobi ezibakozere kara. Jenny n’agamba ati: “Nyine ekizibu ky’amaani eky’okwehurra nk’ow’ataine mugaso gwona. Haroho ebintu ebinakozere kara ebindukweijukya, nahabweki nyegambira nti Ruhanga tasemeriire kuhurra esaara zange.”
Iwe oyehurra ota ha kusaba? Obworaaba naiwe wakehurraga nk’abantu abatwaruga kubazaaho rundi oine okugurukyagurukya kwona ha kusaba, nikisobora kukuhuumuza kukimanya ngu Baibuli n’esobora kugarukamu kurungi ebikaguzo byawe. Nitusobora kwesigira kimu Baibuli eky’egamba ha kusaba;a kandi nesobora kukukonyera kutunga ebigarukwamu eby’ebikaguzo binu:
Mali Ruhanga ahurra esaara zaitu?
Habwaki esaara ezimu zitagarukwamu?
Nitusobora tuta kusaba kandi tukahulirwa Ruhanga?
Esaara nizisobora kutugasira zita?
a Baibuli erumu esaara ez’abaheereza ba Ruhanga baingi, otwalireemu n’eza Yesu Kristo. Ebyahandiikirwe eby’Oruheburaniya, baingi ebibeeta Endagaano Enkuru, birumu esaara ezirukuhingura omu 150.