Lindirra Empero y’Obusinge Bunu Otarukutiina

Omu kasumi akatali ka hara okugumiisiriza kwa Yahwe hali ensi enu nikwija kuhwaho. Amadiini ag’ebisuba galihwerekerezebwa, amahanga agakwataniize hamu nigaija kutahirra abantu ba Ruhanga, kandi Yahwe alihwerekereza ababi ha Haramagedoni. Abakristaayo balindiriire ebintu binu ebirukuhuniiriza n’ekihika kingi.

Amananu gali, titumanyire byona ebirukukwata ha muhito omwingi. Ekyokurorraho, titumanyire akasumi konyini obugulitandika. Titumanyire ensonga zonyini amahanga ezigalisigikirraho kutahirra amadiini. Titumanyire ekiribaho amahanga obugalitahirra abantu ba Ruhanga kandi okutahirra kunu kulimara kasumi ki. Ekindi titumanyire omulingo gwonyini Yahwe ogwalikozesa kuhwerekereza ababi ha Haramagedoni.

Baitu Ebyahandiikirwe nibitugambira byona ebiturukwetaaga kumanya kusobora kulindirra akasumi ako tugumire kandi twine obumanzi. Ekyokurorraho, tumanyire ngu tuli ha kumalirra ‘kw’ebiro ebya hanyuma.’ (2Tim 3:1) Tukimanyire ngu ebiro amahanga galimara gatahiriire amadiini “biricwibwaho” nukwo ediini ey’amananu etahwerekerezebwa. (Mat 24:22) Tukimanyire ngu Yahwe alijuna abantu be. (2Pet 2:9) Kandi tukimanyire ngu Ogu Yahwe ow’akomere kuhwerekereza ababi kandi alinde ekitebe ekingi kuraba omu Haramagedoni w’okwesiga kandi w’amaaani maingi.​—Kus 19:11, 15, 16.

Ebiribaho omu kasumi ak’omu maiso nibiija kuleetera abantu ‘kugwa ensazi n’okutiina.’ Baitu kakuba tusoma kandi tukecumiitirizaaho omulingo Yahwe yajuniremu abantu be omu busumi obwa kara, hamu n’ebyo ebyatumanyisize ha busumi obw’omu maiso, nitwija ‘kurora haiguru twimukye emitwe yaitu,’ nitukigumiza kimu ngu okucungurwa kwaitu kuli haihi kuhika.​—Luk 21:26, 28.