Amagezi Agaratukonyera Kufoora Ensorrokano z’Obuheereza z’Omugaso

Kusisanaho n’ensorrokano ezindi zoona ez’ekitebe, ensorrokano z’obuheereza nazo Yahwe azituhaire zitusobozese kwekambisangana kwoleka okugonza n’okukora ebikorwa ebisemiire. (Baheb 10:24, 25) Zisemeriire kumara edakiika itaano rundi musanju, ekirukutwarramu kugaba abatebezi, kuboleka nambere baratebeza, n’okusaba. (Kakuba orusorrokano runu rubaho hanyuma y’orusorrokano rw’ekitebe, rusemeriire n’okuba rugufu muno.) Arukurwebembera asemeriire kubazaaho ekintu ekirakonyera abarukugenda omu buheereza kiro eki. Ekyokurorraho, Kyamukaaga, nikisobora kuba kirungi kubazaaho enyanjura ey’okukozesa, nk’oku abatebezi baingi baba bamazire ebiro bingi batarukwejumbira omu buheereza. Bintu ki ebindi ebimusobora kubazaaho?

• Enyanjura kuruga omu Katabu k’Ensorrokano Obwomeezi n’Obuheereza Bwaitu nk’Abakristaayo

• Omulingo gw’okukozesa ekintu ekibaireho rundi ebiri omu makuru kutandika kubaza n’omuntu

• Omulingo osobora kugarukamu ekikaguzo baingi ekibakira kukozesa kutuhakaniza

• Omulingo ogw’okugarukamu omuntu ow’arukwikiriza ngu ebintu bitahangwe, ow’arukubaza orulimi orundi, rundi anyakuli omu diini etarukukanya omu kiikaro kyanyu

• Omulingo gw’okukosesaamu kimu ha bintu ebiri ha mukura gwa jw.org, JW Library^® app, rundi omu Baibuli

• Omulingo gw’okukozesaamu kimu ha bintu kuruga omu Bikwato Byaitu Ebitukozesa Kwegesa

• Omulingo gw’okwejumbira omu gumu ha miringo y’okukutebeza, ekyokurorraho kutebeza n’okozesa esimu, kuhandiika amabbaruha, kutebeza omu rwijwire, kugarukira abotebiize, rundi kwegesa Baibuli

• Kwijukya abatebezi ebirukukwata ha kwerinda, kuhindahinduramu, kwetwaza kurungi, kuba n’entekereza ey’ehikire, rundi ekintu ekindi

• Isomo rundi vidiyo kuruga omu burocuwa Wekambire Okusoma n’Okwegesa

• Omulingo osobora kukonyera n’okugarramu amaani ow’oratebeza nauwe

• Ekyahandiikirwe ekirukukwata ha buheereza rundi ekyokurorraho ekirukukwata ha buheereza ekirukugarramu amaani