Omulingo Tusobora Kukurakuraniza​—Kugonza Ruhanga n’Abataahi Baitu

Abakristaayo n’obu baraaba batakyahondera Ebiragiro bya Musa, ebiragiro ebibiri ebirumu ebirukukira obukuru​—kugonza Ruhanga hamu n’okugonza bataahi baitu—​na hati, bitwoleka byona Yahwe arukutwetagisa. (Mat 22:37-39) Okugonza kunu tituzarwa nakwo, baitu tusemeriire kukukolerra. Omu mulingo ki? Omulingo omukuru nukwo kusoma Baibuli buli kiro. Obutwegaho emiringo enungi eya Ruhanga kurabira omu Byahandiikirwe, kitukonyera kurora “oburungi bwa [Yahwe].” (Zab 27:4) Ekirugamu, okugonza okutwiniire Yahwe kweyongera kandi tutunga n’entekereza nk’eye. Kandi kinu kituletera kworobera ebiragiro bye, otwaliremu n’ekiragiro eky’okugonza abantu abandi. (Yoh 13:34, 35; 1Yo 5:3) Enu niyo emiringo esatu, ey’esobora kutukonyera kwegondeza omu kusoma Baibuli:

• Kozesa obusobozi bwawe obw’okutekereza notera obusisani kandi okozese n’enyehurra zaawe. Wesisanirize nk’anyakuli omu kiikaro eky’orukusomaho. Bintu ki eby’orukurora, ebyorukuhurra kandi n’ebyorukukaga? Abantu aborukusomaho nibehurra bata omu nyikara ei barumu?

  

• Kozesa emiringo erukwahukana. Enu eri emu ha miringo tusobora kukikoramu: Soma omwiraka erikuhulirwa, rundi soma n’ohondera Baibuli ey’ekwasirwe omu maraka. Soma Ebyahandiikirwe ebirukukwata ha muntu omu, rundi isomo eryorukugonza kumanya omu kiikaro ky’okusoma esuura nk’oku zihonderaine omu Baibuli. Nk’ekyokurorraho n’osobora kukozesa, ekicweka ekirukwetwa Appendix A7 rundi B12 ekiri omu Baibuli eya New World Translation of the Holy Scriptures kusoma ebirukukwata hali Yesu. Soma esuura yoona nambere Ekyahandiikirwe ekya buli kiro kihirwe. N’osobora n’okusoma ebitabu bya Baibuli kusigikirra ha kasumi byahandiikirwemu.

  

• Soma kwetegereza. Kusoma esuura emu buli kiro, okagyetegereza kandi okagyecumitirizaaho nikikira kusoma esuura nyingi otazetegeriize. Tekerezaaho eby’ali biroho kasumi ako kandi lengaho kumanya amakuru g’engiga enkuru. Kozesa maapu hamu n’Ebyahandiikirwe ebiri omu mbaju rundi hagati ya Baibuli ebirukusoborra ebirukukiraho. Tunga obwire oseruliirize hakire ha nsonga emu eyotetegeriize. Obukiraaba nikisoboka, kozesa obwire oburukwingana n’obu, obwomara n’osoma kucumitiriza haby’osomere.