Omulingo Tusobora Kuhika ha Mutima gw’Omuntu Ou Turukwegesa
1. Abantu bakwatwahoga bata Yesu obuyayegesaga?
1 Yesu Kristo obu yayegesaaga abantu bayetegerezaga. Kiro kimu, Yesu obwakaba nasoborra abeegeswa be Ebyahandiikirwe, bakakwatwaho muno ha mitima yabu. (Luka 24:32) Nk’oku Ruhanga agonza abantu kumworobera kuruga ha mutima, tusobora tuta kukoonyera abeegi baitu kukora empinduka omu bwomeezi bwabu?—Bar. 6:17.
2. Kwoleka amagezi n’okufaayo bisobora bita kutukoonyera kuhika ha mutima gw’omwegi waitu?
2 Yoleka Okufaayo n’Amagezi: Abantu abamu kubagambira bugambira embaganiza y’ekintu ekihikire hali ekitahikire tikirukumara kubakoonyera kukora empinduka. Twijuke ngu okukozesa ebyahandiikirwe bingi kubooleka ngu enyikiriza yabu egwire nikisobora kubabiihiza bakalekeraho kwega. Obuturaaba nitugonza kwegesa omuntu akeetegereza, tusemeriire kubanza kwetegereza habwaki naikiriza atyo. Obuturakozesa ebikaguzo ebirukumuleetera kuteekereza, nikiija kutukoonyera kumanya enteekereza ye. (Nfu. 20:5) Obu nubwo turamanya ekyahandiikirwe ekiturukusobora kukozesa kumukoonyera kwetegereza. Nahabwekyo tusemeriire kwoleka omuntu outurukwegesa ngu nitufaayo kandi tube bagumisiriza. (Nfu. 25:15) Oijuke ngu abantu tibakurakuranira ha rulengo rumu. Muhe obwire kurora omwoyo gwa Ruhanga ogurukwera gwamukoonyera kuhindura enteekereza ye n’ebikorwa bye.—Mar 4:26-29.
3. Nitusobora tuta kukoonyera omwegi waitu okurakuraniza emiringo emirungi?
3 Bakoonyere Kukurakuraniza Emiringo Enungi: Ebyahandiikirwe ebirukubaza ha burungi bwa Yahwe n’okugonza okwaine nibisobora kukoonyera abeegi baitu okukurakuraniza emiringo emirungi. Nitusobora kukozesa ebyahandiikirwe nka Zabuli 139:1-4 rundi Luka 12:6, 7 kumwoleka ngu Yahwe afaaho buli muntu. Omuntu obwarayetegereza omulingo Yahwe aine embabazi, naija kweyongera kugonza n’okwirra haihi na Yahwe byeyongera kukurakurana. (Bar. 5:6-8; 1 Yoh. 4:19) Kandi obwaramanya omulingo Yahwe ayehurra habw’engeso zaitu, nikisobora kumwekambisa kukora ebintu ebirukusemeza Yahwe.—Zab. 78:40, 41; Nfu. 23:15.
4. Tusobora tuta kulekera abantu abaturukutebeza obugabe bw’okwecweramu?
4 Yahwe tahambiriza muntu wena kumuheereza, baitu atugambira omulingo turukusobora kugasirwa kakuba tuhondera ebiragiro bye. (Is. 48:17, 18) Tuba nituhondera ekyokurorraho kya Yahwe obutuleka omuntu okwecweramu. Abantu obuberorra ngu nibeetagisa kukora empinduka omu bwomeezi bwabu, encwamu ezibakora ziba nnungi kandi baheereza Yahwe begondiize. (Bar. 12:2) Kandi kibakoonyera kwira haihi na “Mukama alenga emitima.”—Nfu. 17:3.