Okuhikiriza Kurungi Obuheereza Bwaitu—Okutendeka Abeegi ba Baibuli Okwesomesa

Habwaki Kiri Kikuru: Kurora bakurakurana omu by’omwoyo, abeegi ba Baibuli basemeriire kwikara nibesomesa nukwo bongerezeeho ha bibarukwega. (Baheb. 5:12–6:1) Tikyanguhire kwesomesa, nahabwekyo nikyetaagisa tuteekemu amaani. Nikitwarramu kulengesaniza ebintu ebihyaka ebiturukwega n’ebyo ebi tubaire tumanyire n’omulingo tusobora kubiteeka omu nkora. (Nfu. 2:1-6) Abeegi obu barayega kuseruliza nikiija kubakoonyera kumanya omulingo basobora kugarukamu ebikaguzo nibakozesa ebitabu byaitu. Obubarateekamu amaani kukozesa ebibeegere nikiija kubakoonyera kugumisiriza okulengesebwa okusobora kubahikaho hanyuma y’okufooka Bakristaayo.—Luk. 6:47, 48.

Omulingo gw’Okukikoramu:

Mwijukye ngu kubanza kusaba Yahwe mutakatandikire kusomesa kikuru. Kinu nikiija kumukoonyera kurora ngu kikuru kusaba obukoonyezi.—Yoh. 14:26; 1 Kol. 2:10.
Omwegi wawe mwijukye okwetekanirizaaga buli murundi muraabaga nimugenda kusoma. Mwoleke omulingo akatabu kaawe kateekaniziibwemu kandi omwegese omulingo gw’okuzoora n’okusazaaho ensonga enkuru zoonka.
Mukoonyere kugarukamu n’akozesa ebigambo bye rundi kusigikira nk’oku ayetegeriize kukira kusoma busoma ekyokugarukamu kuruga omu katabu.
Tererra omwegi wawe kusoma Baibuli buli kiro. Mwoleke puroguramu eri ha mukura gwaitu ogwa jw.org rundi omu Watchtower eya Agusito 1, 2009 rupapura 15-18, ey’arukusobora kuhondera n’asoma Baibuli. Okwekamba nikwetaagisa kusobora kusoma Baibuli tukagimaraho kyonka nitwija kugasirwa.—Zab. 1:2, 3.
Yoleka omwegi wawe omulingo asobora kukozesa Watchtower Library rundi Watchtower ONLINE LIBRARY kutunga eby’okugarukamu eby’ebikaguzo ebirukusigikirra ha Baibuli. Mukoonyere kumanya ebitabu ebitukira kukozesa omu nso’rokano zaitu n’amabara gabyo.

Lengaho Kinu Okwezi Kunu:

Hanyuma y’okumalirra esuura rundi omutwe omutiito, saba omwegi wawe akugambire omu bugufu ebyayegere. Obworaaba otaine omwegi wa Baibuli, soma ekicweka omu Watchtower rundi omu Baibuli hanyuma lengaho kurora obworaaba n’osobora kwijuka eby’osomere omu bugufu.Kinu nikiija kukukoonyera kweyongera kwetegereza eby’orukusoma.