Akasanduuko k’Ebikaguzo

◼ Abatebezi basemeriire kukozesa intaneeti kutebeza rundi kwegesa Baibuli abantu abarukwikara omu nsi zindi?

Abatebezi bamu bakozesiize intaneeti kwegesa abantu Baibuli. Kinu kikizire kukorwa omu mahanga nambere omulimo gwaitu gw’okutebeza gutarukwikirizibwa rundi ensi ezitaine abatebezi baingi. Kinu kikoonyire abantu bamu kwega amananu. Baitu twina kwijuka ngu haroho akabi ak’okusindikira abantu abatutamanyire obutumwa. (Rora Our Kingdom Ministry eya Julaayi 2007, rup. 3.) Nobukiraaba ngu kinu nitusobora kukikora n’ekigendererwa ky’okwegesa abantu amananu, nitusobora kwesanga tunywaine abantu ab’engeso embi rundi abahakaniza. (1 Kol. 1:19-25; Bak. 2:8) Ekintu ekindi, omu mahanga agamu Abakaiso ba Yahwe tibarukwikirizibwa kutebeza. Nitusobora kuletera ab’oruganda ebizibu kakuba abalemi bakimanya ngu nitukozesa emikura rundi amabbaruha kutebeza omu ihanga eri. Nahabwekyo, abatebezi tibasemeriire kukozesa emikura n’ekigendererwa ky’okutebeza abantu ab’omu mahanga gandi.

Kakuba tutebeza omuntu anyakubungire bubunga kuruga omu ihanga erindi, titusemeriire kweyongera kumwegesa nitukozesa omukura kakuba agaruka owabu oihireho itaagi rituragiire okweyongera. Nitusobora kumwoleka omulingo asobora kukozesa jw.org kumanya ebirukukiraho. Rundi nitusobora kumwoleka omulingo asobora kuhikirra itaagi ryaitu ery’omu nsi ye. Nitusobora kumugambira ngu aserre nambere Abakaiso ba Yahwe baso’rokanira. Obwaraaba nagonza Abakaiso ba Yahwe bamuhikirre, nosobora kwijuza foomu Please Follow Up (S-43) ogiheereze omuhandiiki w’ekitebe kyanyu arukwija kugisindika nakozesa omukura gwaitu gwa jw.org. Itaagi ryaitu erikusangwa omu ihanga nambere omuntu onu arukwikara niriija kumukoonyera habwokuba nirimanya kurungi ebiragiro by’ihanga byalyo.—Rora Our Kingdom Ministry ya Juuni 2014, rup. 7, hamu na Our Kingdom Ministry eya Novemba 2011 rup. 2.

Obuturaaba twine omuntu ou turukwegeseza ha mukura rundi omwegi waitu bwaragaruka omu ihanga lyabu, tuhondere oburagirizi obutuhairwe. Nitusobora kwikara nitubazaaho nauwe obwire bumu n’obumu kuhikya abatebezi ab’omu ihanga lye baramuhikirra. Baitu obwaraaba naikara omw’ihanga nambere Abakaiso ba Yahwe batarukwikirizibwa kutebeza, tusemeriire kwegendesereza obuturaaba nitukozesa esimu, omukura, rundi ebbaruha kumugambiraho ebirukukwata ha Baibuli.—Mat. 10:16.