Mwikale n’Ekigendererwa ky’Okufoora Abantu Abeegeswa
1. Abantu obu baraaba bali b’okujunwa, kiki ekitusemeriire kukora?
1 Ripooti ey’omwaka gw’obuheereza ogwa 2014 n’eyoleka omulingo Abakaiso ba Yahwe behaireyo kutebeza amakuru amarungi ag’Obukama. (Mat. 24:14) Abantu baingi bahikirweho amakuru amarungi kuraba mu kutebeza nju ha nju, kampaini z’okugaba turakiti na kaadi ez’okuraliza abantu, hamu n’okutebeza omu rwijwire. Abantu obu baraaba bali b’okujunwa, tusemeriire kubeegesa Baibuli nukwo bafooke beegeswa.—1 Tim. 2:4.
2. Bikaguzo ki ebitusemeriire kwekaguza ebirayoleka ngu twetegekere kwegesa abantu Baibuli?
2 Oikale Oyetegekere Okwegesa Abantu Baibuli: Kirungi twekaguze ebikaguzo binu: Omuntu obwaba n’agonza kwega Baibuli, ndengaho kutunga ebirukumukwataho kandi nkagarukayo bwangu n’ekigendererwa ky’okutandika kumwegesa Baibuli? Nkasembayo ddi okwoleka omuntu ou nsangire omurundi ogw’okubanza omulingo twegesaamu Baibuli? Nakasabahoga omuntu ou ntwarra magaziini okumwegesa Baibuli? Nakoolekaga ab’enganda, abanywani, abataahi, abeegi, rundi abakozi bagenzi bange vidiyo zaitu Habwaki Osemeriire Kwega Baibuli?, na Omulingo Twegesa Abantu Baibuli. Obumba nintebeza ninkozesa emeeza rundi akagaali, abantu mbasoborra ngu twine enteekaniza ey’okwegesa Baibuli batasaswire sente?
3. Kiki ekirukwetagisibwa kusobora kwegesa kurungi amananu?
3 Yahwe na Yesu Nibatukoonyera: Ekiragiro ky’okugenda kutebeza Yesu akakitandika n’agamba, “mugende.” Kinu kikakaba nikyoleka ngu tusemeriire kuteekamu amaani kurora twahikirra abantu. Ekiragiro kinu kikaba kitarukumanyisa ngu atulekeriire baitu akaturaganiza okuba naitwe. (Mat. 28:19, 20) Yahwe atuheriize omwoyo ogurukwera, ebintu eby’okukozesa kandi y’atwegesa n’omulingo gw’okwegesaamu abantu amakuru amarungi. (Zek. 4:6; 2 Kol. 4:7) Tusobora kusaba Yahwe atuheereze amaani n’omutima gw’obwekambi nukwo tusobole kukora omulimo omukuru gunu.—Baf. 2:13.
4. Obuturaaba nitutebeza, habwaki tusemeriire kufaayo muno kufoora abantu abeegeswa?
4 Okutebeza kutuletera okusemererwa. Baitu obutukoonyera omuntu kwega amananu agarukuhikya “omu bwomeezi obutahawaho,” tutunga okusemererwa okurukukiraho (Mat. 7:14; 1 Bas. 2:19, 20) Ekirukukirayo obukuru, obuturakora omulimo gunu n’ekigendererwa ky’okufoora abantu abeegeswa, “Yahwe atarukugonza omuntu wena okubura [okuhwerekerra] baitu bona bahike omu kwegarukamu” naija kusemererwa.—2 Pet. 3:9.