Kozesa “Ebitwega Kuruga omu Kigambo kya Ruhanga”—Okutandika Kubaza n’Abantu
1. Kicweka ki ekihyaka ekitutungire ekiturukugenda kutandika kukozesa omu buheereza?
1 Empindura ya New World Translation 2013 eina ekicweka ekirukwetwa “Ebitwega Kuruga omu Kigambo kya Ruhanga.” Tusobora tuta kukozesa ekicweka kinu nituteekaniza ebiturabazaaho tuli omu buheereza? Habwokuba ebikaguzo n’ebyahandiikirwe ebiri omu kicweka kinu biteekaniziibwe nk’ebyo ebiri omu Reasoning book, kisobora kutukoonyera kutandika kubaza n’abantu tuli omu buheereza.
2. Tusobora tuta kukozesa ekicweka “Ebitwega Kuruga omu Kigambo kya Ruhanga” omu buheereza?
2 Osobora kukozesa ekikaguzo 8 okagamba: “Nitubungira abantu habwokuba baizire nibekaguza, ‘Ruhanga nuwe aleetera abantu ebizibu?’ [Omu biikaro bimu, kirungi kwoleka omuntu ow’orukubaza nauwe nambere oihire ekikaguzo ekyo.] Iwe wakugarukiremu ota? [Muleke agarukemu.] Baibuli egarukamu ekikaguzo kinu.” Musome kandi mubazeeho ebimu ha byahandiikirwe ebyolekerwe kuruga omu Baibuli. Kakuba ayoleka ngu n’agonza kumanya ebirukukiraho, mwoleke ebikakugo 20 ebiri ha kutandika kwa Baibuli kandi omusabe akomemu kimu ekimurabazaaho omurundi gundi. Rundi osobora kumulekera kimu ha bitabu ebitukozesa kwega Baibuli n’abantu ekirukwongera kusobora ekimubalizeeho.
3. Nitusobora kukozesa tuta “Ebitwega Kuruga omu Kigambo kya Ruhanga” kutandika kubaza n’omuntu omu biikaro nambere hakira kuba abantu abatarukwikiririza omu Bukristaayo?
3 Ekikaguzo 4, 13 kuhika 17 biija kutukoonyera nitutebeza omu biikaro nambere abantu batali Bakristaayo. Nk’ekyokurorraho, osobora kukozesa ekikaguzo 17 okagamba: “Nitubazaaho n’abantu ebintu ebirukukwata ha maka. Naiwe n’okirora ngu amaka gaina emitalibaine nyingi? [Muleke agarukemu.] Abaswerangaine baingi basangire ebigambo binu biri by’omugaso muno: ‘Omukazi atinege iba.’ [Tikirukwetagisa kumugambira ngu eby’osomere nibiruga omu Abefeso 5:33. Obworaaba n’obaza n’omukazi, baza bubaza ebigambo ebiri omu Abefeso 5:28.] N’oteekereza kuteeka ebigambo binu omu nkora kisobora kukoonyera abaswerangaine?”
4. Hanyuma y’okubaza n’omuntu atarukwikiririza omu Bukristaayo, osobora kumugambira ki?
4 N’omaliira, kora enteekaniza ey’okugarukayo weyongere kwega nauwe. Omurundi ogundi, musobora kubaza ha kyahandiikirwe kindi ekiri hansi y’ekikaguzo ekimubalizeeho. Omu kasumi akarungi, osobora kumugambira ngu ebi mwizire nimubazaaho byoona, obaire n’obiiha omu Baibuli. N’osigikirra ha bimwizire nimwegaho n’omulingo atwaramu Baibuli, osobora kumuheereza akatabu ak’orukurora ngu karamusikiriza kweyongera kwega.—Rora akapapura ok’omunda akali omu Our Kingdom Ministry ya Desemba 2013.