Okuhikiriza Kurungi Obuheereza Bwaitu— Tunga Omuntu ow’Oratwarraga Magaziini

Habwaki Kiri Kikuru: Abantu baingi bagonza bugonza kusoma magaziini zaitu baitu tibagonza tukabeegesa Baibuli. Abamu basobora kuba batarukukigonza habwokuba baba nibateekereza ngu ediini yabu niyo ehikire kandi abandi baba bataina obwire bw’okwega. Obu baraikara nibasoma magaziini zaitu, basobora kugonza kumanya ebirukukiraho. (1 Pet. 2:2) Nihasobora kubamu ekicweka ekibasomere kyabakwataho rundi obwomeezi bwabu buhindukire. Obuturaikara nitubabungira, kiija kubanguhira kutukaguza, kandi naitwe kiija kutwanguhira kwetegereza ebirukubakwataho. Nasobora kwikiriza kwega Baibuli.

Omulingo gw’Okukikoramu:

Buli mwezi, tunga obwire omutwarre magaziini empyaka. Osobora kumubungira n’ebiro ebindi nukwo mubazeeho kimu ha kintu ekiri omu magaziini eziwamulekiire, rundi mutwarre ekitabu ekirukugabibwa omwezi ogu. Handiika buli bwire obw’orukugendayo, ebimubalizeeho hamu n’ekitabu kyomulekiire—Rora Janwali 2014 Our Kingdom Ministry, rup. 3.
Banza oteekanize kurungi otakagarukireyo. Otamutwarra butwarra magaziini, baitu lengaho n’okumubalisiriza nukwo osobole kuletaho obunywani hagati yanyu ekirakukonyera kumusikiriza kwega amananu.
Kozesa omugisa gwona ogw’oratunga kumwegesa Baibuli. Kakuba akukaguza ekikaguzo ekirukusigikirra ha Baibuli, muleetere ekitabu ekitukozesa kwegesa abantu Baibuli ekirumu eky’okugarukamu nikyo okozese kumugarukamu. Otakarugireyo, mulekere ekikaguzo kindi ekirukukwata ha bintu mubalizeeho eki muligarukamu omurundi gundi. Obworaaba oikaire n’okozesa Baibuli rundi kimu ha bitabu byaitu kunyumyaho nauwe, n’obu kwakuba habw’obwire buke, osemeriire kumubara nk’omwegi wa Baibuli. Wakamuhaire burocuwa ya Amakuru Amarungi kandi wamwoleka omulingo twegesaamu abantu Baibuli? Wakamwolekere vidiyo Habwaki Osemeriire Kwega Baibuli? Hamu na Omulingo Twegesa Abantu Baibuli? N’obukiraaba ngu asobora kuba aikaire atarukugonza kwega, nasobora kuhindura ebiteekerezo bye akatandika kwega. Nosobora kulengaho omulingo gunu?

Lengaho Kinu Okwezi Kunu:

Handiika amabara g’abantu orukugonza kutwarraga magaziini empyaka. Batwarre magaziini ez’omwezi gunu kandi obagambire ngu noija kubaleetera ez’omwezi ogurukwija.