Weyongere Okukurakurana nk’Omuheereza
1. Byokuroorraaho ki eby’omu kyaasa eky’okubanza ebirukwoleka ngu tusemeriire kweyongera kukurakurana nk’abaheereza?
1 Abakristaayo basemeriire kweyongera kukurakurana omu buheereza bwabu. Egyo niyo nsonga habwaki Yesu yatendekere abegeswa be okutebeza. (Luk. 9:1-5; 10:1-11) Kandi niyo nsonga habwaki Akura na Pirusikira batwaire Apolo omu maka gaabu, ‘bamusobo’re omuhanda gwa Mukama.’ (Eng. 18:24-26) Paulo nauwe akatereerra Timoseo omutebezi omurungi, okweyongera okwesomesa n’okuteeka omu nkora ebi yali n’ayega, nukwo ‘okuhingurana kwe kwolekwege hali bona.’ (1 Tim. 4:13-15) N’obuturaaba tumazire emyaka nyingi nitutebeza amakuru amarungi, tusemeriire kweyongera kukurakurana.
2. Tusobora tuta kwegera hali abandi?
2 Yegera Hali Abandi: Kwegera hali abatebezi abandi nugwo mulingo gumu oguratukoonyera kweyongera kukurakurana. (Nfu. 27:17) Nahabwekyo kiba kirungi kutayo omwoyo ow’oruganda ow’ogenzere nauwe omu buheereza aina ow’arukubaza nauwe. Kaguza abatebezi abandi nambere orukwetaaga kusemeza omu buheereza bwawe kandi okoorre hali ebi bakugambire. (Nfu. 1:5) Kikugumiirra kugarukira omuntu, kutandika kwegesa omuntu Baibuli, rundi kukozesa emiringo endi yoona omu kutebeza? Hikiirra omuroleerezi wa gurupu yanyu rundi omutebezi akurakuraine akukoonyere. Kandi osemeriire kwijuka ngu Yahwe atuheereza omwoyo gwe ogurukwera ogutukonyera kukurakurana, nahabwekyo gumusabe butoosa.—Luk. 11:13.
3. Tusemeriire kwetwara tuta kakuba omuntu atuha obuhabuzi n’obukyakuba ngu titubusabire?
3 Emirundi emu osobora kusabibwa kuhinduramu rundi kuterekereza omu mulingo otebeza, tikisemeriire kububihiza. (Mug. 7:9) Nka Apollo, twija kwoleka ngu tuli beebundazi obu turaikiriza okuterekerezebwa kandi tukakusiima. Nikiija kwoleka ngu tuli b’amagezi.—Nfu. 12:15.
4. Nsonga ki Yesu eyi yahaire ey’okweyongera kukurakurana nk’abatebezi?
4 Okukurakurana Kwaitu Kuhaisaniza Yahwe: Yesu akakozesa ebyokuroorraaho kukoonyera abegeswa be okukurakurana. Akerengesaniza ha muzabibu kandi abegeswa be ha mataagi. Akagamba ngu ise akonera buli itaagi eryaanire ebyaana nukwo ‘likanye okwana.’ (Yoh. 15:2) Nk’omukama w’omusiri gw’emizabibu okw’agonza amataagi goona gaane, Yahwe nauwe nukwo agonza tweyongere kukurakurana nitwana omu buheereza bwaitu. (Baheb. 13:15) Biki ebiraruga omu kwekamba kwaitu? Yesu atuha eky’okugarukamu: ‘Isenyowe anyumizibwa inywe obu mwana ebyana bingi.’—Yoh. 15:8.