Okuhikiriza Kurungi Obuheereza Bwaitu—Omulingo Tusobora Kugarukamu Omuntu Atucomiire

Habwaki Kiri Kikuru: Abantu abamu abatusanga tuli omu buheereza baba n’engeso enungi. Baitu Yesu akaragura ira ngu abamu balitunoba. (Yoh. 17:14) Nahabwekyo tikyakutuhuniriize kusanga omuntu akatucomera. Kakusangwa ekyo kibaho, twakugondeze kwetwara omu mulingo ogurasemeza Yahwe. (Bar. 12:17-21; 1 Pet. 3:15) Kwetwaza kurungi nikisobora kukoonyera butaletaho akajagaaro. Kandi kiina omulingo kiija kukwataho ogu atucomiire, n’abandi ababaireho. Abakaiso ba Yahwe kakusangwa bagarukayo omurundi ogundi, abantu abo basobora kubahuliriza.—2 Kol. 6:3.

Omulingo gw’Okukikoramu:

Otaruga omu mbeera sigara otekaine kandi otabiihirwa. Ekyo nikiija kuleetaho obusinge. Gonze akujumire, otayanguhiriza kubiihirwa. (Mug. 7:9) Asobora kuba aine ebizibu rundi niwe agenzereyo omu bwire obw’atarukwetaagiramu omuntu weena kumutalibaniza. N’obukiraaba ngu ebi tumugambire nibyo bimubiihize, tukiijuke ngu obwire obumu abantu nk’abo baba bahabisiibwe.—2 Kol. 4:4.
Mugarukemu kurungi. (Nfu. 15:1) Omwihire omu turo rundi ha mirimo ye? Gonze tuba tutaina ensobi yoona ei tukozere habw’okuteebeza amakuru amarungi, kiba kirungi kumusaba atuganyire habw’okwizira omu bwire obubi. Atucomiire habwokuba akatuhuraho ebintu eby’ebisuba? Obukiraaba kiri kiti, osobora kumugamba: “Ninkyetegereza habwaki ekintu nk’ekyo kisobora kukubiihiza. Baitu ebi wahuliire bisuba. “N’ogonza nkusoboorre amananu?” Osangire n’ahakaniza emu ha nyegesa zaitu gamba nk’omuntu kubingwa omu kitebe rundi habwaki tutaikiriza kuteekebwamu esagama? N’osobora kumugamba: “Ninkyetegereza. N’abantu abandi bakibalizeho. N’ogonza nkwoleke kuruga omu Baibuli nambere tusigikira kwegesa tuti?”
Omuntu obwaraaba abihiirwe muno, kirungi kumuleka okagenda otamugarukiremu kintu kyoona. Kakuba akugamba ngu Abakaiso ba Yahwe bataligaruka owe, mugambire ngu eky’asabire nikiija kuteekwamu ekitiinisa.

Lengaho Kinu Okwezi Kunu:

Mube n’ebyokuroorraaho omu kuramya kw’eka ebirukwoleka omulingo musobora kukozesa amagezi ganu.
Hanyuma y’okuruga omw’omuntu abacomiire, mubazaaho omulingo omurungi ogu mwakubaire nimumugarukamu.