Okuba n’Abeegi ba Baibuli Abarukukurakurana
1. Abatebezi abaina abeegi ba Baibuli baina bujunaanizibwa ki?
1 Busaho muntu arukusobora kufooka muheereza wa Ruhanga oihireho Yahwe nuwe amusembiize. (Yoh. 6:44) N’obukiraaba kiri kiti, abatebezi basemeriire okuhikiriza obujunaanizibwa bwabu obw’okukonyera abantu okwirra haihi na Ruhanga. (Yak. 4:8) Kinu nikimanyisa ngu twina kweteekaniza kurungi. Okusoma akacweka n’okukaguza ekikaguzo ekiri omu katabu tibirukumara kusobora kukoonyera abeegi baitu okwetegereza ebi barukusoma n’okukurakurana.
2. Biki omutebezi ebyaina kukora kukonyera omwegi we okukurakurana, kandi biki ebirarugamu?
2 Abatebezi kusobora kuba n’abeegi abarukukurakurana basemeriire (1) kubakonyera kwetegereza Baibuli eky’eyegesa, (2) okwikiriza Baibuli eby’eyegesa (3) n’okubiteeka omu nkora. (Yoh. 3:16; 17:3; Yak. 2:26) Kisobora kutwara akasumi kukonyera omwegi kuraba omu madaara ganu. Baitu buli idaara liija kukonyera omwegi okukurakuraniza enkoragana ye na Yahwe n’okwehayo.
3. Habwaki abeegesa abarungi bakozesa ebikaguzo?
3 Ebiratukonyera Kumanya Ogu Ou Turukwegesa eky’Arukuteekereza: Okumanya omwegi waitu obwaraaba n’ayetegereza kandi n’aikiriza eby’arukwega, kirungi otabaza muno baitu nauwe omuheereze omugisa akugambire omulingo ayetegeriize ebi musomere. (Yak. 1:19) N’ayeteegereza Baibuli eky’erukwegesa ha nsonga eyi murukwegaho? Asobora kusoboorra eby’ayegere omu bigambo bye? Eby’arukwega abitwara ata rundi bimukwasireho bita? Nakirora ngu kiri ky’amagezi kukoorra ha misingi ey’ayegere kuruga omu Baibuli? (1 Bas. 2:13) Nakirora ngu kakuba ateeka omu nkora eby’arukwega, bisobora kumukonyera kusemeza obwomezi bwe? (Bak. 3:10) Kutunga eby’okugarukamu eby’ebikaguzo binu, twina kukaguza omwegi ebikaguzo ebiramukonyera kusoborra uwe ekyayetegeriize, kandi tuhulirize kurungi.—Mat. 16:13-16.
4. Kiki ekitusemeriire okukora omwegi obu araaba atarukwetegereza eby’arukwega rundi kitamwanguhiire okubiteeka omu nkora?
4 Kitwara akasumi omwegi okuleka emize embi n’okuhindura enteekereza ye. (2 Kol. 10:5) Kakuba ayanga okuteeka omu nkora eby’orukumwegesa? Nikyetagisa obugumisiriza nukwo Ekigambo kya Ruhanga hamu n’omwoyo gwe ogurukwera bihike ha mutima gwe. (1 Kol. 3:6, 7; Baheb. 4:12) Omu kiikaro ky’okuhambiriza omwegi kuteeka omu nkora eby’arukwega, kikukira kugenda omu maiso n’okwega ebintu ebindi ebiramwanguhira okwetegereza. Obu turayeyongera okumwegesa n’obugumisiriza kandi tukamwoleka okugonza, nikisobora kumukonyera okukora empinduka ezirukwetaagisa mpora mpora.