Okuhikiriza Kurungi Obuheereza Bwaitu—Okwoleka ngu n’Ofaayo h’Abantu ab’Orukutebeza
Habwaki Kiri Kikuru: Yesu yali amanyire ebyetaago by’abantu kandi y’abafaahoga. Nk’ekyokuroorraaho, obu yali n’agenda kutambira omusaija omu, omufu w’amatu, akakyetegereza ngu akaba aina ensoni. Nahabwekyo, akamugarra ha rubaju nambere abantu bakaba batali, y’amutambira. (Mar. 7:31-35) Yafaayoga h’abeegeswa be, n’abeegesa ebintu bitaitotaito, ebi bali nibasobora kwetegereza kurungi. (Yoh. 16:12) Nobwaraaba ali omu iguru hati, n’akyafaayo hali abantu. (2 Tim. 4:17) Nk’Abakristaayo, tusemerire okuhondera eky’okuroorraaho kye. (1 Pet. 2:21; 1 Yoh. 3:16, 18) Obu turatwara obwire kumanya enyehura y’abantu abaturukutebeza, tukafaayo kumanya ebibarukugonza n’enyikara yaabu, nikiija kutukonyera kuhikiriza kurungi obuheereza bwaitu. Abantu nibaija kutuhuliriza obu barakirora ngu titubatwalire butwarra ebitabu n’amakuru amarungi baitu ngu nitukikora habwokuba nitubafaaho.
Omulingo gw’Okukikoramu:
• Wetekanize kurungi. Okufaayo h’abantu, okutekaana n’okumwega nibiija kukukonyera.
• Banza wetegereze embeera, haroho ebirukwoleka ngu ow’obungiire aina abaana? mulimi rundi agonza ebisoro? munyadiini? Ebintu ebyo bisobora kukukonyera kutunga eky’okubazaho nauwe.
• Mukaguze ekyarukutekereza ha nsonga eyi murukubazaho kandi omuhulirize kurungi. Obwaba n’abaza, otamucwa akalimi. Mutunurre kumwoleka ngu n’omuhuliriza. Musiime habw’ebitekerezo bye, kandi werinde okuteera nauwe empaka.
• Wetegeke okuhindura. Obukiraba nikyetagisa osobora kuhindura n’obaza hali ebyo ebirukweralikiriza omuntu ow’obungiire mu kiikaro ky’ebyo eby’otekaniizege kubazaaho. Habwokuba turakiti, brocuwa, na magaziini zaitu zibaza ha nsonga ezirukwahukana, zisobora kukukonyera kukora kinu. Obworaba osangire aina ebyarukukora, kozesa obwire butaito.
Lengaho Kinu Okwezi Kunu:
• Mukozeseho obwire butaito muli omu kuramya kw’eka, rundi omu buheereza okwoleka omulingo omutebezi asobora kuhindura enyajura ey’abaire ateekaniize akakozesa endi erukuhikaana n’eby’omuntu amugarukiremu.
• Omu nso’rokano z’obuhereza, ow’oruganda asobora kubazaho rundi okwoleka omulingo tusobora kwoleka ngu nitufaayo hali abantu.