Muhondere Ekyokuroraho kya Banabbi—Nahumu
1. Ekitabu kya Nahumu kitwegesa ki?
1 Ebitongo bya Nineve bukaiso oburukwoleka ngu nka Nahumu yarangire, Yahwe ahoora enzigu abanyanzigwa be kandi ngu n’abo abarukuzooka bali ba maani tibarukusobora kumusingura. (Nah. 1:2, 6) Okwetegereza obunabbi bwa Nahumu nikiija kutukonyera omu buheereza bwaitu.
2. Tusobora tuta kugarramu abantu amaani nitutebeza?
2 Batwarre Amakuru Agarukuhuumuza Kandi Agarukuleeta Okunihiira: Obw’obanza kusoma ekitabu kya Nahumu, kizooka nk’ekirukubaza hali omusango ogwacwerirwe Nineve orubuga orukuru orwa Asura gwonka. (Nah. 1:1; 3:7) Baitu okucwera omusango orubuga oru gaali makuru marungi hali abantu ba Yahwe. Ibara Nahumu rimanyisa “Omuhuumuza.” Nahumu akagumya Abayudaya bagenzi be ngu omunyanzigwa waabu yaali n’agenda kuhwerekerezebwa omu kasumi akatali kaahara. Nahumu akongera yakigumya ngu Yahwe nuwe “orukomero rwamani omu biro byobujune.” (Nah. 1:7) Obu tuba nitutebeza amakuru amarungi, tuterera abantu kufoora Yahwe obwirukiro bwabu.—Nah. 1:15.
3. Nitusobora tuta kukozesa ebyokurorraho omu buhereza nka Nahumu?
3 Kozesa Ebyokuroraho: Yahwe akaterekereza Nahumu kuhandiika n’alengesaniza okuhwerekereza kwa Nineve hali orubuga rw’Abamisiri, Thebes (No-amon) orwali ruhwerekerezibweho Asura. (Nah. 3:8-10) Obu tuba nitugambira abantu hali empero y’entekaniza ya Sitani, kirungi tuboleke obunabbi obuli omu Baibuli oburukwoleka omulingo Yahwe ahikirizamu ekigambo kye. Nk’ekyokurorraho, Abababuloni na Abamede obu barumbire orubuga rwa Nineve omu mwaka 632 B.C.E., enjura ey’amaani eyagwire ekaletera amaizi g’ekisaaru kya Tigris okusandaara, ekyarugireho ekimu ha bisiika eby’amaani eby’orubuga oru okuggwa. Orubuga rwa Nineve rukahambwa nkoku Yahwe akaba arangire.—Nah. 1:8; 2:6.
4. Tusobora tuta kubaza omu mulingo ogurukwetegerezebwa tuli omu buheereza bwaitu?
4 Ebyorukubazaho Biina Kuba Nibyetegerezebwa Kurungi: Nahumu akahandiika n’asoborra kurungi ebintu kandi omu mulingo ogwanguhire kwetegereza. (Nah. 1:14; 3:1) Naitwe tusemerire kukozesa orulimu orwanguhire kwetegereza. (1 Kol. 14:9) Omurundi ogw’obaandize, kubungira omuntu, musoborre kurungi ensonga ekutwaire. Obwoba n’oyegesa abantu Baibuli, bakonyere kukurakuraniza okwikiriza okugumire omu Yahwe hamu n’Ekigambo kye, n’omulingo barukukwatwaho ebi begere.—Bar. 10:14.
5. Obunabbi bwa Nahumu butugumya buta?
5 Ebiri omu kitabu kya Nahumu byoona nibyoleka ngu Nahumu yaali n’akigumya ngu ekigambo kya Yahwe kyaali nikiija kuhikirizibwa. Okuhwerekerezebwa kw’entekaniza ya Sitani nkoku kwirirre haihi, ebigambo binu nibituhuumuza: “Omuhito tiguliimuka omurundi ogwakabiri.”—Nah. 1:9.