ISOMO 14

Kwihayo Kurungi Ensonga Enkuru

Abaheburaniya 8:1

EKY’OSEMERIIRE KUKORA: Konyera abarukukuhuliiriza kukuhondera obworaaba noha orubazo rwawe kandi yoleka omulingo buli nsonga enkuru erukukwatagana n’ekigendererwa kyawe hamu n’omutwe ogw’orukubazaaho.

OMULINGO OGW’OKUKIKORAMU:

Ba n’ekigendererwa. Wetegereze ekigendererwa ky’orubazo rwawe obukiraaba ky’okumanyisa abantu, kuha obwakaiso oburukugumya, rundi kubakonyera kumanya eky’okukora. Binu nibyo osigikirreho obworaaba notekaniza. Kigumye ngu ensonga zaawe enkuru niziija kuhikiriza ekigendererwa kyawe.

Wekaguze: ‘Abarukumpuliiriza nibasobora kuba nibekaguza bikaguzo ki, rundi bintu ki ebi basobora kuhakaniza ha nsonga enu? Biki ebibasobora kubanza kwekaguza kandi nsonga ki ezibasobora kwanguha kuhakaniza?’ Hanyuma, binu nibyo osigikirreho kutekaniza omulingo ensonga zaawe zirahonderangana, nukwo kisobozese abarukukuhuliiriza kwetegereza, n’okwikiriza eby’orukubagambira.
Gumya omutwe gw’orubazo rwawe. Ikara noyoleka omutwe gw’orubazo rwawe obu n’ogarukamu ebigambo ebikuru rundi ebigambo ebiine amakuru agarukusisana n’omutwe gw’orubazo rwawe.
Yorobya kandi yoleka kurungi ensonga zaawe enkuru. Komamu ensonga enkuru zonka, ezirukukwatagana n’omutwe ogw’orukubazaaho kandi ez’osobora kwegesa kurungi omu bwire obwohairwe. Ensonga enkuru ez’orayegesaaho zitaba nyingi, buli nsonga enkuru gyoleke kurungi, otakagenzere ha nsonga endi culeeramu kake kandi obworaaba n’osoborra ensonga zaawe leka zikwatagane kurungi.

N’osobora kubazaaho ensonga enkuru omu nyanjura yaawe kukonyera abarukukuhuliiriza kukuhondera obworaaba n’osoborra rundi n’osobora kwongera kuzibazaaho omu bugufu obworaaba nomalirra orubazo rwawe.