Yesu Ayegeseza ha Rusozi

Yesu obuyamazire kukoma abakwenda 12, akasirimuka yairra haihi n’abantu baingi abakaba besoroize hamu. Abantu banu baali barugire Galiraya, Buyudaya, Turo, Sidoni, Busuli hamu n’ebicweka bya nseeri ya Yorudani. Bakamuletera abantu abaali barwaire endwaire eza buli mulingo kandi n’abakutalibanizibwa abadaimoni. Yesu akabakiza boona. Hanyuma akaikarra ha rubaju rw’orusozi kandi yatandika kubegesa. Akasoborra ekitusemeriire kukora kusobora kuba banywani ba Ruhanga. Tusemeriire kumanya ngu nitwetaaga Yahwe omu bwomeezi bwaitu kandi twine kumugonza. Baitu titusobora kugonza Ruhanga kakuba tuba tutarukugonza abantu abandi. Buli muntu tusemeriire kumwoleka embabazi n’obwinganiza, n’obwaraaba ali munyanzigwa waitu.

Yesu akagamba ati: ‘Tikirukumara kugonza abanywani baawe bonka. Baitu osemeriire n’okugonza abanyanzigwa baawe kandi n’okuganyira abantu kuruga ha mutima gwawe. Omuntu obwaraaba akubihiriirwe, genda omusabe ekiganyiro bwangu. Twaza abandi omu mulingo wakugondeze bakutwazemu.’

Yesu akongera yabaha obuhabuzi oburukukwata ha itungo. Akagamba ati: ‘Kikuru muno kuba munywani wa Yahwe kukira kuba na sente nyingi. Omusuma nasobora kwiba sente zaawe baitu busaho muntu asobora kwiba obunywani bwawe na Yahwe. Leka kweralikirra eky’oralya, eky’oranywa rundi eky’orajwara. Yegera ha binyonyi. Ruhanga abiha eby’okulya ebirukumara. Kweralikirra muno tikurukwija kwongera habw’obwomeezi bwawe n’obukyakuba ekiro kimu. Ijuka ngu, Yahwe amanyire ebyetaago byawe.’

Abantu abaali nibahuliiriza Yesu bakahunirra muno habw’omulingo akaba nayegesaamu. Abebembezi baabo ab’ediini tibabegesaaga ebintu binu. Habwaki Yesu yali mwegesa murungi? Habwokuba byona ebiyayegesaaga byali nibiruga hali Yahwe.