Setani Ayohya Yesu

Yesu obuyamazire kubatizibwa, omwoyo ogurukwera gukamutwara omu irungu. Akakwatwa enjara habwokuba akaba amazire ebiro 40 omu irungu atarukulya. Hanyuma Setani akaija kwohya Yesu kandi yamugambira ati: ‘Obworaaba oli Mwana wa Ruhanga, gambira amabaale ganu gafooke migaati.’ Baitu Yesu akamugarukamu n’akozesa Ekyahandiikirwe ati: ‘Kikahandiikwa ngu tibiri by’okulya byonka ebikonyera omuntu kwomerra. Baitu osemeriire kuhuliiriza ekigambo kyona kuruga hali Yahwe.’

Setani akongera yasoisoimya Yesu ati: ‘Obworaaba mali oli Mwana wa Ruhanga, guruka kuruga ha yekaru haiguru ogwe hansi. Kikahandiikwa ngu Ruhanga naija kusiindika bamaraika bakukwate otagwa.’ Yesu akongera yakozesa Ekyahandiikirwe nagamba ati: ‘Kikahandiikwa ngu otalirenga Yahwe.’

Hanyuma, Setani akongera yayoleka Yesu obukama obw’ensi, obuguuda bwayo hamu n’ebitiinisa byayo kandi amugambira ati: ‘Ninyija kukuha obukama bunu bwona hamu n’ekitiinisa kyabwo kakuba ondamya omurundi gumu gwonka.’ Baitu Yesu akamugarukamu ati: ‘Genda, Setani! Kikahandiikwa ngu oramyege Yahwe wenka.’

Setani akarugaho yagenda kandi bamaraika bakaija baletera Yesu eby’okulya. Kwiha obu, Yesu akatebeza amakuru amarungi ag’Obukama. Nugwo omulimo ogu yali aizire kukora omu nsi. Abantu bagonzaaga byona ebi Yesu yabegesaga kandi bamuhonderaga hoona nambere yagendaga.