Orubuga Yerusalemu Ruhwerekerezebwa

Abantu ba Yuda baikaraga nibajemera Yahwe kandi nibaramya abaruhanga ab’ebisuba. Kumara emyaka nyingi, Yahwe yaikaraga nalengaho kubahabura. Akabasindikira banabbi baingi kubahabura, baitu batabahuliirize. Oihireho baikaraga nibabasekereza. Yahwe akamaraho ata okuramya kw’abo okw’ebisisani?

Omukama wa Baburoni, Nebukadeneza, akaba asingwire amahanga maingi. Ha murundi gwe ogw’okubanza kusingura Yerusalemu, Omukama Nebukadeneza akakwata kandi yatwara omu Baburoni Omukama Yehoyakini, ababiito, abarwani, hamu n’abahesi. Akatwara nitungo lyona erikaba liri omu yekaru ya Yahwe. Hanyuma Omukama Nebukadeneza akakoma Zedekiya kuba omukama wa Yuda.

Zedekiya akabanza yayorobera Nebukadeneza. Baitu amahanga agaali gamwehingulirize hamu n’abanabbi ab’ebisuba bakamuha amagezi ngu ajemere omukama wa Baburoni. Nabbi Yeremiya akamuhabura namugambira ati: ‘Obworajema, Yuda niija kubamu oburwaire, enjara, kandi n’abantu nibaija kwitwa.’

Hanyuma y’okumara emyaka munana nalema, Zedekiya akacwamu kujemera Baburoni, kandi yasaba ihe rya Misiri kumukonyera. Omukama Nebukadeneza akasindika ihe rye kurwanisa Yerusalemu, kandi likaija lyagota orubuga. Nabbi Yeremiya akagambira Omukama Zedekiya ati: ‘Yahwe agambire, obworayehayo hali Baburoni torukwija kwitwa kandi n’orubuga tirukwija kuhwerekerezebwa. Baitu obworayanga, Abababuroni nibaija kwokya Yerusalemu kandi naiwe bakutwale nk’omunyagwa.’ Zedekiya akamugarukamu ati: ‘Tindukwija kwehayo.’

Hanyuma y’omwaka gumu n’ekicweka, Abababuroni bakacwa ebisiika bya Yerusalemu kandi orubuga barwokya. Bakaita abantu baingi, batwara enkumi n’ekumi z’abantu bababohere kandi na yekaru bagyokya.

Omukama Zedekiya akatoroka omu Yerusalemu, baitu Abababuroni bakamwirukya. Bakamukwatira haihi na Yeriko kandi bamutwara hali Omukama Nebukadeneza. Omukama wa Baburoni akaita abatabani ba Zedekiya omu maisoge. Hanyuma Nebukadeneza akaihamu Zedekiya amaiso kandi yamuta omu nkomo nambere yaferiire. Baitu Yahwe akaraganiza abantu ba Yuda nagamba ati: ‘Hanyuma y’emyaka 70, ninyija kubagarra owanyu Yerusalemu.’

Kiki ekyakuhikire hali abasigazi abaali batwairwe nk’abanyagwa omu Baburoni? Bakasigara bali besigwa hali Yahwe?