Batahikirize Ekibayeragire

Yahwe akagambira Musa ati: ‘Temba orusozi oije nambere ndi. Ninyija kuhandiika ebiragiro byange ha bibbali by’amabaale nukwo mbikukwase.’ Musa akatemba orusozi yamarayo ebiro 40. Obwakaba ali ha rusozi, Yahwe akahandiika ebiragiro ikumi ha bibbali by’amabaale yabikwasa Musa.

Hanyuma y’akasumi, Abaisareri bakatekereza ngu Musa akaba abalekereho. Bakagambira Aroni bati: ‘Nitugonza omuntu aratwebembera. Tukorre ruhanga!’ Aroni akabagarukamu ati: ‘Mumpe ezaabu yanyu.’ Akaagya ezaabu yoona ei bamuhaire yagikoramu ekisisani ky’enyana. Abantu bagamba: ‘Enyana enu nuwe Ruhanga waitu ayatwebembiire kuruga Misiri!’ Bakatandika kuramya enyana enu ey’ezaabu n’okujaguza. Mali eki bakozere kikaba kiri kirungi? Nangwa, habwokuba bakaba baraganiize kuramya Yahwe wenka. Baitu hati bakaba bacwire ekiragaano eki bakozere.

Yahwe akarora eki bakaba nibakora yagambira Musa ati: ‘Sirimuka ogende hansi osange abantu. Banjemiire batandika kuramya ruhanga ow’ebisuba.’ Musa akasirimuka akwasire ebibbali bibiri eby’amabale ebikaba bihandikirweho ebiragiro.

Obu yairirre haihi n’enkambi, akahurra abantu nibazina. Hanyuma akabarora nibacekeca kandi nibainamira ekisisani ky’enyana. Musa akabihirwa muno, yanaga hansi ebibbali bibiri ebikaba bihandiikirweho ebiragiro, byacwekacweka. Aho n’aho akahwerekereza ekisisani ky’enyana eki bakaba nibaramya. Hanyuma yakaguza Aroni ati: ‘Abantu basoboire bata kukusonasona kukora ekintu ekibi ekya mulingo gunu?’ Aroni akamugarukamu ati: ‘Otambihirirwa. Naiwe omanyire omulingo abantu banu betwaza. Babaire nibenda ruhanga ondi, nanyowe nanaga ezaabu yabo omu murro harugamu akanyana kanu!’ Aroni tiyakukozere ekintu kya mulingo gunu. Musa akagarukayo ha rusozi yayesengereza Yahwe kuganyira abantu banu.

Yahwe akaganyira boona abaali nibagonza kumworobera. Norora omulingo kyali ky’omugaso Abaisareri kuhondera oburagirizi n’obwebembezi bwa Musa?