Omuhito Ogwa Ikumi

Musa akaraganiza Faraho ngu akaba atarukwija kwongera kumurora. Baitu obwakaba atakagenzere, akagambira Faraho ati: ‘Kiro kinu omu itumbi, omwana wena omuzigaijo owa Misiri, kutandikira ha mwana wawe kuhikira kimu ha mwana w’omwiru, n’aija kufa.’

Yahwe akaragira Abaisareri kulya ekiihuro eky’embaganiza. Akagamba ati: ‘Mwite ekyana ky’entaama rundi eky’embuzi ekihikize omwaka gumu, musiige esagama ha miryango. Mutalike enyama, mugirye n’emigaati etatumbisiibwe. Mwikale mujwaire ebijwaro byanyu n’enkaito zanyu mwetegekere kugenda. Itumbi linu ningenda kubaiha omu bwiru.’ Teramu akasisani orole omulingo Abaisareri basemeriirwe.

Omu itumbi, maraika wa Yahwe akagenda omu buli nju yoona ey’abantu ba Misiri. Buli nju yoona ey’ekaba ine omulyango gutasigirwe esagama yaferwaga omwana omwojo omuzigaijo. Baitu maraika yahinguraga enju zoona ezikaba zisigirwe esagama. Buli ka yoona ey’abantu ba Misiri, abaguuda n’abanaku boona bakaferwa omwana omuzigaijo. Baitu busaho mwana weena ow’Abaisareri ayafiire.

Mutabani wa Faraho nauwe akafa. Kinu, Faraho kikamuhinguranaho. Aho n’aho akagambira Musa na Aroni ati: ‘Mwimuke. Muruge hanu mugende. Mugende muramye Ruhanga wanyu. Mutwale ebisoro byanyu mugende!’

Ekiro eki okwezi kukaba nikujwera kimu Abaisareri obu barugire Misiri batekaniziibwe kurungi omu bika byabo n’enganda zabo. Abasaija bakaba nibahika omu 600,000 kandi hakaba harumu abaana n’abakazi baingi muno. Kandi hakaba haroho n’abantu bandi baingi ababeteranizeho kugenda nabo nukwo n’abo basobole kuramya Yahwe Ruhanga ow’Abaisareri. Abaisareri bakatunga obugabe!

Kusobora kwijuka omulingo Yahwe akaba abajuniremu, bakaba baine kulya ekiihuro nk’eki baliire obu bakaba nibagenda kurugayo, omurundi gumu buli mwaka. Kikaba nikyetwa Okuhingurwaho.