Emihito Esatu Eyabandize

Abaisareri bakahambirizibwa kuba bairu. Yahwe akaha Musa na Aroni obutumwa bunu kubutwara hali Faraho: ‘Leka abantu bange bagende nukwo bandamize omu irungu.’ Faraho akagarukamu n’emyehembo n’agamba ati: ‘Tindukwenda kumanya Yahwe eby’arukugamba, tindukwija kuleka Abaisareri kugenda.’ Faraho akacwamu kubongera emirimo ey’amaani erukukira n’eyi bakaba nibakora. Yahwe akaba n’agenda kwegesa Faraho isomo. Omanyire omulingo akaba n’agenda kukikoramu? Akaletera Abamisiri emihito ikumi. Yahwe akagambira Musa ati: ‘Faraho tarukumpuliiriza. Nyenkyakara n’aija kuba ali ha Kyambu Nilo. Musangeyo omugambire ngu habwokuba ayangire kuleka abantu bange kuruga Misiri, amaizi g’Ekyambu Nilo nigaija kuhinduka gafoke sagama.’ Musa akorobera Yahwe yatwarra Faraho obutumwa bunu. Faraho akarora omulingo amaizi g’ekyambu gafokere sagama hanyuma ya Aroni kukozesa omwigo gwe kutera omu maizi. Ekyambu kikatandika kununka, encu zafa, kandi hakaba hatakyaroho amaizi marungi ag’okunywa. Baitu nabwo Faraho akanga kuleka Abaisareri kugenda.

Hanyuma y’ebiro musanju, Yahwe akongera yatuma Musa hali Faraho amugambire ngu: ‘Obworaaba otalekere abantu bange kugenda, ebikere nibiija kwijura omu nsi yoona eya Misiri.’ Aroni akaimukya haiguru omwigo gwe, ebikere byatandika kwijura ensi yoona. Abantu bakasanga ebikere biri omu maju gabo, omu bitabu byabo, n’omu bakuli zabo. Ebikere bikaba biri buli hamu hoona! Faraho akasaba Musa kwesengereza Yahwe kwihaho omuhito gunu. Faraho akaraganiza ngu akaba n’agenda kuleka Abaisareri bagende. Yahwe akemereza omuhito gunu, hanyuma Abamisiri basorooza emituumo n’emituumo y’ebikere eby’ali bifire. Ensi ekatandika kununka. Baitu, Faraho akongera yayanga kulekera abantu ba Ruhanga kugenda.

Hanyuma, Yahwe akagambira Musa ati: ‘Aroni akozese omwigo gwe kuteera ha itaka, ecuucu niija kufooka enda, rundi obuhuka obutaito oburukuruma.’ Aho n’aho, enda zikaijura buli hamu hoona. Abamu ha bantu ba Faraho bakamugambira: ‘Omuhito gunu niguruga hali Ruhanga.’ Baitu Faraho nabwo yayanga kuleka Abaisareri kugenda.