Yahwe Atebwe Yusufu

Yusufu obwakaba ali omu nkomo, Faraho omukama wa Misiri akaroota ekirooto ekyalemere buli omu kurotorra. Omu h’abahereza ba Faraho akamugambira ngu Yusufu n’asobora kurotorra ekirooto kye. Aho n’aho, Faraho akatuma balete Yusufu.

Faraho akamukaguza: ‘Nosobora kurotorra ebirooto byange?’ Yusufu akagambira Faraho ati: ‘Misiri niija kuba n’eby’okulya bingi muno habw’emyaka musanju kandi emyaka musanju erahonderaho nihaija kubaho enjara. Wekomere omuntu ow’amagezi akonyere omu kwahura eby’okulya nukwo enjara etaita abantu.’ Faraho akamugarukamu ati: ‘Nakoma iwe! Kandi omu ihanga lyona erya Misiri, niiwe orukwija kuba wakabiri omu kitiinisa!’ Yusufu akamanya ata amakuru g’ekirooto kya Faraho? Yahwe nuwe yamukonyire.

Emyaka musanju eyahondiireho, Yusufu akagimara n’ahunika eby’okulya. Hanyuma, enjara y’amaani ekagwa omu nsi yoona nk’oku Yusufu akaba agambire. Abantu bakaruga buli nsonda kwija hali Yusufu kumuguraho eby’okulya. Ise Yusufu, arukwetwa Yakobo akahurra ngu omu ihanga lya Misiri hakaba haliyo eby’okulya, nahabweki akatuma batabani be ikumi kugenda kugura eby’okulya.

Batabani ba Yakobo obu bagenzere hali Yusufu, akanguha kubamanyirra. Baitu ubo batamanye ngu nuwe Yusufu. Bakamwinamira bamutamu ekitiinisa nk’oku akaba arosere omu buto bwe. Yusufu akaba n’agonza kumanya abagenzi be obu baraaba baali bakyaine enobi nk’eya kara. Akabagambira ati: ‘Muli ntasi. Nimugonza kumanya ihanga lyaitu obu liraaba liri liceke.’ Bakamugarukamu bati: ‘Nangwa! Tuli baana 12 aba isiitwe kandi nituruga Kanani. Omu ha bagenzi baitu akafa kandi omuto ali na isiitwe.’ Yusufu yabagarukamu ati: ‘Mundetere mugenzi wanyu ogu omuto, nubwo ndabaikiririzamu.’ Hanyuma, bakagarukayo ow’abu.

Eby’okulya obu byayongiire kuhwaho, Yakobo akongera yatuma abatabani bagarukeyo omu ihanga lya Misiri. Omurundi gunu, bakagenda na mugenzi wabo omuto arukwetwa Benyamini. Kusobora kulenga bagenzi be, Yusufu akasereka ekikopo kye eky’efeza omu nsaho y’eby’okulya eya Benyamini hanyuma y’abajunaana ogw’obusuma. Abaheereza ba Yusufu obu basangire ekikopo kiri omu nsaho ya Benyamini, bagenzi be bakarabwamu enkizi. Bakesengereza Yusufu kubafubira omu kiikaro kya Benyamini.

Obu nubwo Yusufu yayetegeriize ngu bagenzi be bakoroba emitima. Yusufu akaba atakyasobora kusereka omulingo akaba n’ayehurra. Aho n’aho akatandika kurra nagamba ati: ‘Ninyowe Yusufu mugenzi wanyu. Ise nyowe akyali mwomeezi?’ Bagenzi be bakahunirra muno. Baitu uwe akabagambira ati: ‘Mutehurra kubi habw’ekimwankozere. Ruhanga nuwe yantumire omu kiikaro kinu nukwo ajune obwomeezi bwanyu. Mwanguhe mugende muleete ise nyowe hanu.’

Bakataaha nukwo bagambira ise bo amakuru amarungi kandi bamutwara omu ihanga lya Misiri. Yusufu na ise bakaba bamazire emyaka nyingi muno batakaroranganaga.