EKIKAGUZO 7

Ndakora ki Haroho Arukunsonasona Okusiihana Nauwe?

HABWAKI KIKURU

Eky’oracwamu hati ha bikwatiraine n’okuterana n’omuntu ondi bisobora kukurugirramu ebirungi rundi kukusiisira obwomeezi bwawe bwona obw’omu maiso.

WAKUKOZERE KI?

Teramu akasisani: Heather na Miike bakamara emyezi ebiri yonka nibarorangana kyonka Heather n’ahurra nk’amanyiire Mike emyaka n’emyaka. Basindikirangana obutumwa, babaza muno ha simu buli kaire kandi haihi buli omu aba amanyire mugenzi eky’arukugenda kugarukaho kubaza. Baitu Mike hati akuzooka n’agonza ekirukukiraho ha kubaza bubaza.

Omu myezi ebiri egyo, bakatandika kukwatangana omu ngaro n’okunywegerangana baitu busaho ekindi babaire nibakora kukira hali ekyo. Heather tarukugonza bakole ekirukukira hali ekyo baitu tarukugonza kuferwa Mike habwokuba namugonza muno. Heather agamba ngu Mike amugamba ngu murungi muno kandi ngu w’embaganiza ha baisiki abandi boona. Heather ateekereza, ‘Kasita Nyowe na Mike nitugonzangana . . .’

Kakuba niiwe Heather, wakukozere ki?

TEKEREZA HALI KINU!

Orugoye nirukozesebwa nk’ekisimuura — Okuterana kisembo Ruhanga ekyahaire abaswerangaine boonka. Obutusiihana tuba nitukozesa kubi ekisembo kinu. Kiba nk’okukozesa orugoye orurungi orubakuhaire nk’ekisimuura

Ensi Ruhanga akagihangiramu ebiragiro byayo. Kakuba oyanga kuhondera ekimu ha biragiro ebyo gamba nk’ekya gravity, otunga ebizibu. Nukwo kiri nobu kihika ha biragiro bya Ruhanga ebirukukwata ha ngeso. Baibuli egamba: “Mulekere kimu obusihani.”—1 Abasesalonika 4:3.

Biki ebirugamu obu twanga kuhondera ekiragiro ekyo? Baibuli egamba: “Anyakusihana asisire omubirigwe wenka.” (1 Abakolinso 6:18) Habwaki nitugamba tuti?

Abaseruliiriza ha bintu ebitali bimu bakizoire ngu abaisiki n’aboojo abasiihana batunga ebizibu binu:

OKWETUNTURA. Ensigato abagwire omu busiihani bagamba ngu nibeijukya habwaki bakikozere
OBUTESIGWA. Obu bamara kusiihana buli omu atandika kwekaguza, ‘Muntu ki ondi omwisiki onu/omwojo onu ou yali abyamireho nauwe?’
OBUTATUNGA EKI BABAIRE NIBANIHIRA. Abaisiki boona bagonza omuntu arabafaaho kukira ogu arukugonza kubakozesa kwonka. Kandi okugonza aboojo okubabaire bainiire omwisiki kuhwaho hanyuma y’okuterana nauwe.
Eky’Osemeriire kwijuka: Obw’oyohebwa okagwa omu busihani, oyemaramu ekitinisa kandi oyefereza ekintu eky’omuhendo. (Abarumi 1:24) Omubiri gwawe gw’omuhendo muno, nahabwekyo tosemeriire kugunagiriza.

Oyoleka ngu n’oyeha ekitiinisa ‘n’olekera kimu obusihani.’ (1 Abasesalonika 4:3) Akasumi obu kalihika okaswerwa rundi okaswera, olitunga omugisa ogw’okuterana na baro rundi omukazi waawe. Noija kwegonza otaine okweralikirra kwona, rundi okweyijukya ebiruga omu kusihana.—Enfumo 7:22, 23; 1 Abakolinso 7:3.

WEKAGUZE:

Omuntu arukukugonza mali asobora kukora ekintu kyona ekisobora kukurugiramu ebizibu n’okurumwa?
Omuntu arukukufaaho asobora kukwohya kukora ekintu ekirasiisa enkoragana yaawe na Ruhanga?—Abaheburaniya 13:4.