Haroho obw’Oteekereza ngu Osigaire Weenka Okahu’ra Otiinire?

Omwana ali omu kisisani n’omurora? Ali weenka kandi atiinire. Haroho obundi naiwe obw’ohu’ra otiinire?— Abantu boona haroho obu behu’ra batyo. Baibuli ebazaho banywani ba Yahwe abayehu’raga batyo. Omu hali bo akaba nuwe Eriya. Katwege ebirukumukwataho.

Eriya yaikaraga omu Isareri ira muno Yesu atakazairwe. Hakaba haliyo omukama ou bayetaga Ahabu, tiyaramyaga Yahwe. Ahabu na mukazi we Yezeberi baramyaga Baali, ruhanga ow’ebisuba. Bakaleetera abantu abarukukira obwingi omu Isareri kuramya Baali. Yezeberi akaba ali mubi muno, akaba n’agonza kwita abantu boona abaramyaga Yahwe otwaliremu na Eriya. Omanyire Eriya eki yakozere?—

Eriya akairuka! Akairukira omu irungu yayesereka omu bwingira. Habwaki yayeserekere?— Nikizooka akatiina. Baitu Eriya tiyakubaire n’atiina. Habwaki? Habwokuba akaba akimanyire ngu Yahwe asobora kumukonyera. Yahwe akaba amazire ira kwoleka Eriya ngu w’amaani. Haroho Yahwe obuyagarukamu okusaba kwa Eriya n’asindika omurro kuruga omu iguru. Nahati akaba n’asobora kumukonyera.

Eriya obwaakaba ali omu bwingira Yahwe akamukaguza: ‘N’okora ki okwo?’ Eriya akagarukamu Yahwe ngu: ‘Ninyowe nyenka asigaireho omu bahereza baawe.’ ‘Nsigaire nyenka kandi nintiina baija kunyita.’ Eriya akaba n’ateekereza ngu abaheereza ba Yahwe boona bakaba bamazire ira kubaita. Baitu Yahwe akagambira Eriya ngu: Nangwa, hakyaloho abaheereza bange 7000. Otatiina, nkyaina biingi ebi ndukugonza onkorre. Noteekereza ekyo Eriya kikamusemeza?—

Kiki eky’orukusobora kwegera hali Eriya?— Tosemerire kutiina habwokuba toli weenka. Oina abanywani abagonza Yahwe kandi naiwe bakugonza muno. Ijuka ngu Yahwe aine amaani kandi aija kukukonyera. Tikikusemeza kumanya ngu toli weenka?—