Yobu Alinda Obwesigwa Bwe

OMUNTU wena n’asobora kwikara ali mwesigwa hali Ruhanga, kakuba alengwa muno n’obukiraaba nikisobora kumurugirramu kufeerwa ebintu bye byona? Ebyahikire hali Yobu nibyoleka ngu eki nikisoboka.

Abaisaleri obubakaba bakyali omu nsi ya Misiri, Yobu ow’akaba ali munyabuzaale wa Iburahimu, akaba naikara omu Arabiya. Haroho akasumi bamalaika omu iguru obubayesorooliize omu maiso ga Ruhanga kandi Sitaani omujeemu nauwe akaba abarumu. Omu maiso gaabo boona Yahwe akakyoleka ngu aine obwesige omu muheereza we omwesigwa Yobu. Yahwe akagamba ngu busaho omuntu ondi wena akaba ali mwesigwa hali uwe kwingana Yobu. Baitu Sitaani akagamba ngu Yobu akaba naheereza Ruhanga habwokuba akaba namuha emigisa kandi namulinda. Sitaani akagamba ngu kakuba ebintu bya Yobu byona bimwihwaho akaba naija kukyena Ruhanga.

Ruhanga akaikiriza Sitaani kwihaho Yobu itungo lye lyona, abaana be kandi hanyuma yamurwaza oburwaire bw’amaani. Habwokuba akaba atakimanyire ngu Sitaani abiinemu omukono, Yobu akaba tasobora kwitegereza habwaki Ruhanga yamulekere yahikwaho ebizibu nka binu. Baitu nabwo, Yobu atehakane Ruhanga.

Abasaija basatu abakaba nibefoora banywani ba Yobu bakaija nambere ali. Omu bigambo byabo ebingi muno ebirukusangwa omu kitabu kya Yobu, bakalengaho kumuletera kwikiriza ngu Ruhanga akaba n’amufubira habw’ebibi ebiyakozere yabisereka. Bakongera bagamba ngu Ruhanga tasemerererwa abaheereza be n’obukwakuba okubesiga. Yobu akanga kwikiriza ebigambo byabo ebitahikire. N’obwesige, Yobu akagamba ngu naiija kwikara ali mwesigwa kuhikira kimu ha kufa!

Baitu Yobu akakora ensobi, akateka muno omutima ha kweyihaho omusango. Omusaija omuto arukwetwa Erihu, ow’akaba aikaire nahuliiriza ebibaali nibabaza, nauwe akabaza. Erihu akahabura Yobu habw’okulemwa kukirora ngu kweza ibara lya Yahwe Ruhanga kikuru muno kukira kulengaho kweza ibara ly’omuntu wena. Ekindi, Erihu akahana muno abasaija abaali nibefoora banywani ba Yobu.

Hanyuma, Yahwe Ruhanga akabaza na Yobu, yaterekereza entekereza ye. Akabazaaho ebyahangirwe bingi ebirukuhuniiriza, yakonyera Yobu kukyetegereza ngu omuntu mutaito muno kakuba omulengesaniza n’obusobozi bwa Ruhanga. N’obwebundaazi, Yobu akaikiriza okuhaburwa kuruga hali Ruhanga. Habwokuba Yahwe “wembabazi nyingi nokuganyira,” akakiza Yobu, yamuha itungo erirukutezaamu kabiri ery’akaba aine kara, kandi yamuha n’abaana ikumi. (Yakobo 5:11) Habwokuba Yobu akaikara ali mwesigwa hali Yahwe n’omu kulengwa okw’amaani, akagarukamu kurungi okusoisoimya kwa Sitaani okurukugamba ngu omuntu tasobora kwikara ali mwesigwa hali Ruhanga kakuba alengwa.

—Nibisigikirra ha kitabu kya Yobu.