Kuguma N’omunywani N’osemerra Kuba Munywani

Obunywani bwombekwa ha kugonza. Obu orukweyongerayongera kwega hali Yahwe n’okugonza kwawe hali uwe nikwija kweyongera. Okugonza kwawe hali Ruhanga obu kukura n’okwegomba kwawe okumuhereza nakwo kukura. Kinu nikija kukuletera kufoka mwegeswa wa Yesu Kristo. (Matayo 28:19) Obw’okuterana hamu n’amaka g’Abakaiso ba Yahwe noija kutunga obunywani na Ruhanga obwe biro n’ebiro. Oine kukora ki?

Oine kwoleka okugonza kwawe hali Ruhanga n’oyorobera ebiragiro bye. “Baitu kunu nukwo [o]kugonza Ruhanga, itwe tukwate ebiragiro bye: kandi ebiragiro bye tibirukulemera.”​—1 Yohana 5:3.

Ta mu nkora oby’orukwega. Yesu akatebeza orubaazo orukugumiza ensonga enu. Omusaija ow’amagezi akombeka enju ye ha mwandara. Kandi omusaija omudomadoma akombeka enju ye ha musenyi. Baitu ihunga n’enjura obu byagwire, enju eya yombekerwe ha mwandara etagwe. Baitu egi eyayombekerwe ha musenyi okugwa kwayo kukaba kukooto. Yesu akagamba ngu abo abahurra enyegesa ye kandi bakabikora nibasisana omusaija ow’amagezi eyayombekere enju hamwandara. Kandi abo abahurra enyegesa ze bakalemwa kuzikorraho akabasisaniza oli omusaija omudomadoma eyayombekere enju ye ha musenyi. Iwe wakugondeze kusisana oha?​—Matayo 7:24-27.

Okwehayo. Kinu nikimanyisa ngu okugendera Yahwe omu kusaba kandi okamugambira ngu nogonza kukora ebyagonza ebiro byoona. Kukora Ruhanga ebyagonza nikyoleka ngu oba ofokere mwegeswa wa Yesu Kristo.​—Matayo 11:29.

Okubatizibwa. ‘Imuka obatizibwe oyogeho ebibi byawe n’okunga ibara lye.’​—Engeso Ezabakwenda 22:16.

Wetabire kimu mu buhereza bwa Ruhanga. “Ekimurakoraga mu kikolege n’omutima nka ha bwa Mukama waitu, kunu tihali habwa bantu.”​—Abakolosai 3:23.