Ruhanga Nakutangirra Ngu Obe Munywani We

Ruhanga n’agonza obe munywani we. Orakitekerizeho nti n’osobora kuba munywani w’Omuntu arukukirayo obukuru omu nsi yoona? Iburahimu ayabaireho ira, aketwa munywani wa Ruhanga. (Yakobo 2:23) Abandi abagambwaho mu Baibuli ngu baali baine omuganjaine na Ruhanga, bakahebwa emigisa nyingi. Nahati bunu abantu kuruga mu bicweka by’ensi yoona bafokere banywani ba Ruhanga. Naiwe n’osobora kuba munywani wa Ruhanga.

Okuba munywani wa Ruhanga kirungi muno okukira kuba munywani w’omuntu wena. Ruhanga takwasa nsoni banywani be abesigwa. (Zabuli 18:25) Okuba munywani wa Ruhanga nikikirrayo kimu okuba nitungo. Omuntu omuguda obwaffa, abandi batwara sente ze. Kyonka abaine obunywani na Ruhanga baine obuguda obutasobora kubaihwaho.​—Matayo 6:19.

Abantu abamu nibasobora kulengaho kukutanga kwega hali Ruhanga. Obundi n’abamu h’abanywani bawe rundi ab’omuka nibasobora kukikora. (Matayo 10:36, 37) Kakuba abamu bakusekereza rundi bakutinisa, wekaguze wenka, ‘N’oha ou ndukugonza kusemeza​—Ruhanga rundi abantu?’ Tekereza hali kinu: Kakuba omuntu akutanga kulya oby’okulya wakumuhulirize? Nangwa! Noyetaga eby’okulya kuba mwomezi. Baitu Ruhanga nasobora kukwomeza ebiro byoona! Otaikiriza omuntu wena kukutanga kwega nkoku osobora kuba munywani wa Ruhanga.​—Yohana 17:3.