Daudi Afoorwa Omukama

SAULO akalengaho kukwata Daudi. Akatwara abasirikale be emanzi 3,000 kugenda kumuserra. Obu Daudi yakimanyire, akatuma entasi okumanya nambere Saulo akaba atiire orukande ekiro ekyo. Daudi akakaguza abasaija babiri ati: ‘N’oha mulinywe aragenda nanye murukande rwa Saulo?’

‘Nyowe,’ nukwo Abisai yagambire. Abisai akaba ali mwana wa Zeruya munyanya wa Daudi. Saulo n’abasaija be bakaba bagwijagire. Daudi na Abisai bakasooba mpora mpora bataaha omu rukande. Batwara icumu n’ekisisi ky’amaizi ekikaba kiri ha mutwe gwa Saulo. Busaho nomu yabahulire rundi kubarora habwokuba boona bakaba bagwijagiriire kimu.

Hati rora Daudi na Abisai hali bali. Baali barugireyo bahikire haiguru ya kasozi. Nubwo Daudi kwamiirra omukuru w’abasirikale ba Isareri ati: ‘Abuneri, kiki ekikutangire kulinda Saulo mukama wawe? Dora! Icumu lye hamu n’ekisisi kye eky’amaizi biri nkaha?’

Saulo yasisimuka. Yayetegereza ngu iraka nerya Daudi. Nukwo yakaguza ati: ‘Niwe Daudi?’ Nosobora kurora Saulo na Abuneri hansi aho?

‘Ego, ninyowe mukama wange,’ Daudi nukwo yagarukiremu Saulo. Nukwo Daudi kumukaguza ati: ‘Habwaki nolengaho kunkwata? Nyowe nkakora kibi ki? Icumu lyawe ndinu Ai omukama. Leka omu h’abasaija bawe ije alitabarre.’

Saulo nukwo kwikiriza ati: ‘Nkozere kubi kandi nkozere eky’obudomadoma.’ Aho, Daudi akegendera, na Saulo yagarukayo omu kikali kye. Baitu Daudi akekengera muno ati: ‘Mubiro ebitali byahara Saulo naija kunyita. Nyina kwirukira munsi y’Abafirisiti.’ Kandi kinu nikyo yakozire. Daudi akabihabiha Abafirisiti ngu hati akaba ali muntu wabo n’abasagika nabo cali bakiikiriza.

Mubwire obwakurasireho, Abafirisiti bakagenda kurwana n’Abaisareri. Mubulemu obu, Saulo na Yonasani nuho baitirwe. Ekintu kinu kikasaliza muno Daudi nukwo yahandiika ekizina ekirungi muno, ekirukugamba kiti: ‘Nkuhu’ra ninsalirwa muno habwawe mugenzi wange Yonasani. Wansemezaga muno muno!’

Hanyuma y’ebi, Daudi akagaruka omu Isareri murubuga orwa Heburoni. Hati hakabaho obulemu hagati y’abasaija abakaba nibasagika Daudi n’abasaija abakaba nibasagika Isebosesi mutabani wa Saulo okuba omukama. Hamperu, abasaija ba Daudi bakasingura obulemu. Daudi akaba ahikize emyaka 30 obu yafoirwe omukama. Akalemera omu Heburoni emyaka musanju n’ekicweka kandi abaana abayazalireyo nibo Ammoni, Abusalomu na Adonia.

Baitu obwire bukahika Daudi n’abasaija be obu baacwiremu kugenda kukwata orubuga orwa Yerusalemu. Yowabu mutabani wa munyanya wa Daudi ondiijo nuwe yayebembiire obulemu. Daudi akasiima Yowabu yaamufoora mukuru w’ihe lye. Hati nubwo Daudi yatandikire kulemera omu rubuga rwa Yerusalemu.