Abagibeoni Abakaba B’amagezi

EBIBUGA bingi eby’omu Kanani nibiketegeka kurwana na Isareri. Nibitekereza ngu nibaija kusingura. Baitu abantu ab’omu rubuga orwa Gibeoni baine entekereza y’embaganiza. Nibaikiriza ngu Ruhanga nakonyera Abaisareri, nahabwekyo batagonze kurwana na Ruhanga. Nomanya Abagibeoni eki bakora?

Bakacwamu okwoleka ngu nibaikara hara muno kuruga aho. N’abamu ha basaija bajwara engoye ezikuliire kimu n’enkaito ezitagukire. Betwekesa enkaina zabu ensahu ezikuzire hamu n’emigaati enyakwomere. Nukwo bagenda hali Yosuha n’okumugamba: ‘Turugire mu nsi ya hara habw’okuhurra kw’okurangaanwa kw’ibara lya Yahwe Ruhanga waawe. Tukahurra byoona ebi yabakoliire omu Misiri. Nukwo abakuru batugambiire ngu tutegeke eby’okulya eby’orugendo twije hanu tubagambire ngu: Tuli bairu banyu. Turaganize ngu timurukwija kuturwanisa. Nimurora engoye zaitu zoona zitagukire habw’orugendo orw’amaani n’ebyokulya byaitu byoona byomere.’

Yosuha n’abakuru abandi bakaikiriza eki Abagibeoni babagambiire, nukwo kubaraganiza ngu tibarukwija kubarwanisa. Baitu hanyuma y’ebiro bisatu byonka, bakakizoora ngu Abagibeoni bakaba nibaikara haihi.

Yosuha akabakaguza ati: ‘Habwaki mwatugambire ngu nimuruga mu nsi ya hara muno?’

Abagibeoni bakagarukamu bati: ‘Tukakikora habwokuba tukagambirwa ngu Ruhanga wanyu Yahwe akaraganiza kubaha ensi enu yoona eya kanani. Nahabwekyo tukatiina muno ngu nimwija kutwita.’ Baitu Abaisareri bakalinda eki banihiize, tibaraisire Abagibeoni, kyonka bakabafoora abairu babu.

Omukama owa Yerusalemu akabihirirwa Abagibeoni habwokukora endagano y’obusinge na Isareri. Nukwo kugambira abakama abandi abbana ati: ‘Mwije munkonyere turwanise Gibeoni.’ Eki nikyo abakama abataano baakozire. ikaba ky’amagezi Abagibeoni kukora endagano y’obusinge na Isareri, ekyaleteriize Kabakama banu boona kwija kubarwanisa? Nitwijja kurora.