Ebisiika Bya Yeriko

KIKI ekirukunaga hansi ebisika bya Yeriko? Nibisisana nka bomu ey’amaani ebitiire. Baitu omu bwire obu bakaba bataine bomu, rundi emundu. Kinu kyamahano ekindi kuruga hali Yahwe! Leka turole nkoku kyabaireho.

Huliriza nkoku Yahwe yagambire Yosuha: ‘Iwe n’abasaija bawe abarwani mwehingulirize orubuga. Murwehingulirize omurundi gumu buli kiro okumara ebiro mukaaga. Mutwale esanduuko y’endagano. Banyakatagara musanju baragyebembera nibateera engwara.’

‘Hakiro ky’omusanju, mulyehinguliriza orubuga emirundi musanju. Banyakatagara balitera engwara na buli muntu alitera obwogo bwingi n’ebisiika by’orubuga birigwa hansi!’

Yosuha n’abantu bakakora nkoku Yahwe yabagambiire. Obu batandikire kurwehinguliriza, buli muntu akaba aculiire. Busaho akaba nabaza ekigambo kyoona. Ekyali nikihulirwa zaali ngwara hamu n’ebigere by’abo abakaba nibarubata. Abanyanzigwa b’abantu ba Ruhanga abakaba bali mu Yeriko batekwa kuba baatiinire muno. Nosobora kurora omuguha gwehuzi erukutukura oguhanikirwe ha idirisa? Idirisa eryo lyali lyoha? Ego, Rahabu akaba akozire nkoku entasi ibiri zikaba zimugambiire okukora. Abanyabuzale be boona bakaba hamu nawe omunda nibarora ekikaba nikigenda omumaiso.

Hamperu y’ekiro kya musanju, obu bakaba bamazire kwetoroora orubuga emirundi musanju, engwara zikagamba n’obwogo bw’amaani obw’abarwani bukabaho, aho ebisiika bikagwa. Hanyuma Yosuha akabagambira ati: ‘Mwite buli muntu ow’omurubuga kandi murwokye. Mukize feeza, zabbu, omulinga n’ekyooma, byo mubite mulyahurro ly’enju ya Yahwe.’

Ha ntasi ibiri Yosuha akabagambira ati: ‘Mugende mu nju ya Rahabu mumuturukye hamu n’abanyabuzale be.’ Rahabu n’abanyabuzale be bakakira nkoku entasi zamunihiize.