Ebyokulya By’omulingo Ogw’embaganiza

NOSOBORA kumanya ebi abantu barukukoma kuruga haitaka? Nibisisana ebirika, nibyera, bitaitotaito. Baitu tibiri nk’ebirika, binu byokulya.

Hati hakaba hahingwireho nk’omwezi gumu kuruga Abaisareri baruga omu Misiri. Bakaba bali omu irungu. Ebyokulya byaali bike muno. Abantu nukwo kutandika okuhyema bati: ‘Kyakubaire kirungi kakuba Yahwe yatwitire mu Misiri. Hakire omu Misiri tukaba twine ebyokulya ebitwagonzaga.’

Nahabwekyo Yahwe akagamba ati: ‘Ndinaga ebyokulya kugwa kuruga haiguru.’ Kino nikyo Yahwe yakozire. Ekiro ekyakurasireho, Abaisareri obu baboine ebintu ebirukwera ebikaba bigwire hansi, bakatandika kukaguzangana bati: ‘Biki bunu?’

Nukwo Musa kubagambira: ‘Binu nibyo byokulya Yahwe ebyabahaire okulya.’ Abantu bakabyeta EMANU. Ekaba nenulirra nka keeki etabwirwemu obwoki bw’enjoki.

Musa akabagambira ati: ‘Buli muntu asoroze eyarasobora kulya.’ Buli kiro omubwire bwanyenkyakara, kinu nikyo abantu bakoraga. Obu omusana gwasarraga, emanu yayagaga.

Musa akagambira abantu: ‘Busaho muntu aine kweyahurra emanu habw’ekiro ekindi.’ Baitu abantu batahulirize. Nomanya ekyabaireho? Ekiro ekyakurasireho emanu ei baali beyahuliire ekaba ijwiremu enzito kandi n’enunka!

Baitu hali haroho ekiro kimu omu wiiki eki Yahwe yabagambire okusorolezamu emanu ey’emirundi ebiri. Ekiro kinu kikaba kiro kyamukaaga. Yahwe akabagambira okweyahurraho emanu habw’ekiro ekikuhonderaho habwokuba akaba atarukugenda kugibanagira ha kiro kya musanju. Obu bayahwire emanu habw’ekiro ekyamusanju, ekaba etalimu nzito nobwakuba okununka! Kinu kyamahano ekindi!

Emyaka yoona Abaisareri bamazire omu irungu Yahwe akaba nabaliisa emanu.